Riçard Morninqstar: Amerika Azərbaycanın energetika sektorunda şirkətlərinin sayının artırılmasında maraqlıdır

Sentyabrın 28-də Azərbaycanda Hyatt Regency otelində Amerika Ticarət Palatasının (AmCHan) “Azərbaycan Respublikasının Milli Məclisinin bələdçisi” kitabının təqdimatında Amerikanın Azərbaycandakı səfiri  Riçard Morninqstar çıxış edib.  

AmCHam Azərbaycanda biznes mühitini dəstəkləyən və təşviq edən qeyri-kommersiya biznes assosiasiyasıdır. Assosiasiya 1996-cı ildə təsis edilib və 240 üzvü var. AmCHam-da cəmləşən biznes qurumları Azərbaycandakı bütün xarici investisiyanın 80 faizini və yerli investisiyanın əhəmiyyətli hissəsini təsil edir. 

Səfir Morninqstar bildirib ki, Amerika Azərbaycanda iqtisadi mühitin inkişafına yardım göstərməyə hazırdır. “Biz Azərbaycanda Amerika şirkətlərinin sayının artırılmasında maraqlıyıq”.

O, Azərbaycan iqtisadiyyatının əhəmiyyətli dərəcədə inkişaf etdiyini, daha da inkişafın zəruriliyini vurğulayıb. 

Riçard Morninqstar çıxışında Dağlıq Qarabağ probleminə də toxunub. “Müzakirə etdiyim əsas məsələlərdən biri də Dağlıq Qarabağ münaqişəsinin nizamlanmasıdır. Münaqişə bütün azərbaycanlıları dərindən narahat edən məsələdir”.     

O, Azərbaycanın Əfqanıstandakı sülhyaratma əməliyyatında əhəmiyyətli rolunu qeyd edib. 

“Azərbaycanın Əfqanıstanda vətəndaş cəmiyyətinin inkişafına və tərəqqisinə yardım göstərmək səylərini dəyərləndiririk”. 

R.Morninqstar Amerikanın Azərbaycan iqtisadiyyatının şaxələndirilməsinə və qeyri-neft sektorunun inkişafına kömək etməyə hazır olduğunu bəyan edib.

“Amerika Azərbaycanın energetika sektorunda çalışan ABŞ şirkətlərinin sayının artırılmasında maraqlıdır. ABŞ energetika sektorunda yalnız bir şirkətlə təmsil olunur. Düşünürəm ki, Amerika şirkətlərinin bu sahədə təmsil olunması çox mühüm əhəmiyyət daşıyır”. 

O, eyni zamanda Azərbaycanın tezliklə ÜTT-ə üzv qəbul olunacağına ümid etdiyini bildirib. “Azərbaycanın ÜTT-ə üzv qəbul olmaq niyyətinin nə dərəcədə ciddi olduğunu bilmirəm, amma biz bunu ciddi hesab edirik. ÜTT-ə qəbul və ÜTT tələblərinə uyğunlaşma Azərbaycan iqtisadiyyatının xeyrinə olar”, - deyə o qeyd edib.-03B-