Azərbaycan və Gürcüstan hərbi əməkdaşlığı genişləndirmək niyyətindədir (yenilənib)

Bu gün Bakıda Azərbaycan və Gürcüstanın müdafiə nazirləri Zakir Həsənov və İrakli Çikovaninin görüşündə iki ölkə  arasında hərbi əməkdaşlığın inkişaf perspektivləri  müzakirə olunub.

Görüş zamanı Həsənov Gürcüstanla strateji tərəfdaşlıq zəminində qurulan əlaqələrin yüksələn xətlə inkişaf etdiyini bildirib.

Onun sözlərinə görə, iki 2024-cü ildə iki ölkə arasında hərbi sahədə ümumilikdə 21 birgə tədbirin keçirilməsi planlaşdırılıb.

Müdafiə naziri gürcüstanlı həmkarını bu ilin sentyabrında Bakıda keçiriləcək ADEX 5-ci Azərbaycan Beynəlxalq Müdafiə Sərgisinə dəvət edib.

Öz növbəsində ÇikovaniAzərbaycan və Gürcüstan arasında mövcud münasibətlərin inkişafı və əlaqələrin genişləndirilməsində bu cür görüşlərin keçirilməsinin vacibliyini qeyd edib.

O deyib ki, Azərbaycanın öz ərazi bütövlüyünü bərpa etməsi Gürcüstan üçün də çox mühüm əhəmiyyət kəsb edir.

Görüşdə birgə təlimlərin intensivliyinin artırılmasının vacibliyi vurğulanıb. Qeyd edilib ki, üçtərəfli formatda keçirilən “Eternity” kompüter dəstəkli komanda-qərargah və “Qafqaz qartalı” təlimləri hərbi qulluqçuların peşəkarlıq səviyyələrinin artırılması ilə yanaşı, onlar arasında dostluq münasibətlərinin inkişafına töhfə verir, eyni zamanda qarşılıqlı təcrübə mübadiləsinə imkan yaradır.

Azərbaycan və Gürcüstan arasında müdafiə sahəsində əməkdaşlığın regionda sülhün və sabitliyin təmin olunmasına töhfə verəcəyinə əminlik ifadə olunub.

Müdafiə nazirlərinin görüşündə həmçinin hərbi və hərbi-təhsil sahələrində əməkdaşlığın inkişaf perspektivlərindən danışılıb, regional təhlükəsizlik və qarşılıqlı maraq doğuran digər məsələlər ətraflı müzakirə edilib.

* * *-

Gürcüstanın müdafiə naziri Bakıya gəlib

İyunun 10-da Gürcüstanın müdafiə naziri İrakli Çikovani Azərbaycana rəsmi səfərə gəlib. O, Azərbaycanın müdafiə naziri Zakir Həsənovla görüşəcək.

Tərəflər müdafiə sahəsində əməkdaşlığı müzakirə edəcəklər, Gürcüstan Müdafiə Nazirliyi bildirib.