Həbsxananın Tibb Müəssisəsində aclıq edən Əfqan Sadıqovun vəziyyəti ağırlaşıb

Gürcüstan Penitensiar Xidmətin Tibb Müəssisəsində aclığı davam etdirən Azərbaycanın Azel TV saytının rəhbəri Əfqan Sadıqovun vəziyyəti ağırlaşıb. Bu barədə Turan-a bazar ertəsi onunla telefon danışığından sonra həyat yoldaşı Sevinc Sadıqova bildirib. 

Sadıqov cinayət təqibinə xitam verilməsi tələbi ilə 31 gündür aclıq edir.

"Son günlər Əfqanın arterial təzyiqi 65/55-ə düşüb. Həkimlər təzyiqini normallaşdırmaq üçün sistem köçürüblər. Buna baxmayaraq, Əfqan aclığı davam etdirir", deyə Sadıqova bildirib.

Əfqanın yalnız israrlı tələblərindən sonra həyat yoldaşı ilə əlaqə saxlamasına icazə veriblər. "Əfqan deyib ki, onun telefon danışığına qadağa qoymaq istəyirlər", deyə həyat yoldaşı qeyd edib.

* Əfqan Sadıqov təqibdən ehtiyatlanaraq, 2023-cü ilin dekabrında ailəsi ilə birlikdə Gürcüstana gəlib. İyulda o, Gürcüstandan Türkiyəyə buraxılmayıb, yalnız Azərbaycana gedə biləcəyi bildirilib.

Avqust ayında Azərbaycanın sorğusu ilə Ə.Sadıqov həbs edilib. Bakıda o, pul tələb etməkdə ittiham olunur və onun ekstradisiyası tələb olunur. Sentyabrın 21-dən o, həbsinə və ona sığınacaq verilməməsinə etiraz əlaməti olaraq aclıq edir.
Oktyabrın 8-də aclıq nəticəsində onun vəziyyəti pisləşib və o, Gürcüstan Penitensiar Xidmətinin Tibb Müəssisəsinə köçürülüb.