Həftə ərzində iqtidarla müxalifət arasında növbəti görüş gözlənilir

İqtidar təmsilçiləri və müxalifət partiyaları nümayəndələri arasında növbəti görüşün bu həftə reallaşa bilməsi mümkündür. Bu haqda Turan-a məlumatlı mənbələrdən məlum olub.

Bu qəbildən ilk görüş 2014-cü il dekabrın 13-də keçirilib. O zaman müxalifətdə olan partiyalardan bir qrupu iqtidarla görüş təşəbbüsü qaldırıb. Rəsmi Bakı PA ictimai-siyasi şöbəsinin müdiri Əli Həsənov səviyyəsində görüşlə bu təşəbbüsə qarşılıq verdi. Amma o zaman görüş təşəbbüsündə iştirakçı olmayan partiyalar da adı çəkilən görüşə qatıldılar. 

Görüşün təşəbbüsçüsü olan Klassik Xalq Cəbhəsi, Demokrat, Ümid, Azadlıq, Aydınlar, Liberal, Böyük Azərbaycan, Vətəndaş və İnkişaf partiyaları ilə yanaşı, adı çəkilən görüşə təşəbbüsçü olmayan Böyük Quruluş, Bütöv Azərbaycan Xalq Cəhbəsi, Kommunust partiyasının təmsilçiləri də qatılmışdılar. Təşəbbüsçü olan partiyalar buna etiraz ifadə etmədilər.

Qarşıda duran görüşün formatının isə daha geniş olacağı gözlənilir. Formatın genişlənəcəyinə hələ o zamankı görüşdə iqtidar təmsilçisi Ə.Həsənov işarə etmişdi.

Qarşıdakı görüşə Müsavat Partiyası rəhbərlyinin qatılacağı da nəzərdə tutulur.

Xalq Cəbhəsi Partiyasına gəlincə, partiya ilk görüşə qatılmadı və buna səbəb kimi belə görüşlərin mənasız olduğunu göstərdi. Partiyanın ilk görüşlə bağlı sərgilədiyi mövqeyə əsasən, qurumun görüşü mənasız sayaraq görüşə qatılmaq istmədiyini demək olar.

İlk görüşdə ölkənin ictimai-siyasi həyatı, insan haqları, siyasi məhbuslar, III sektor təmsilçilərinin həbsləri kimi mövzular diqqət mərkəzində olub. Mənbələr görüşün gündəliyi haqda hər-hansı açıqlama verməyiblər. -05D-