Hüquq müdafiəçiləri Avropa qurumlarından Elnur Seyidovun işini unutmamağı xahiş edirlər

Ölkənin 10 hüquq müdafiəçisi Avropa Şurasının İnsan Hüquqları üzrə Komissarı Nils Muiznieksə, Avropa Şurası Parlament Assambeleyasının siyasi məhbuslar üzrə mərüzəçisi Kristofer Ştrasserə, Avropa İttifaqınının nümayəndəliyinin başçısı səfir Roland Kobiyaya, ATƏT-in Bakı ofisinin rəhbəri səfir Koray Tarqaya müraciət ünvanlayıblar.

Sənəddə Azərbaycan Xalq Cəhbəsi Partiyasının sədri Əli Kərimlinin qaynı, “Texnika bank”da mənimsəmə faktı ilə bağlı əsassız olaraq həbs edilmiş Elnur Seyidovun taleyini diqqət mərkəzində saxlamaq çağırışı yer alıb. 

Müraciətdə qeyd edilir ki, Seyidov MTN-in təcridxanasında saxlanılır və onun səhhətində ciddi problemlər var. Bu yaxınlarda “Texnika bank”ın sədri Etibar Əliyev azad edilib və onun tabelisinin həbsdə saxlanılması ən azından, məntiqsiz görünür.

İstintaq göstərib ki, Seyidov cinayət törətməyib, lakin vəkillərin qətimkan tədbirinin dəyişdirilməsi və Seyidovun xəstəliyi ilə əlaqədar sərbəst buraxılması haqqında vəsatətlərinə məhəl qoyulmur.

Bütün bunlar Seyidovun həbsinin siyasi xarakterli olduğunu hesab etməyə əsas verir, deyə müraciətdə qeyd edilir. -02D-