Hüquq müdafiəçiləri Obama administrasiyasını Əliyev hakimiyyətinə güvənməməyə çağırıblar

Cümə axşamı demokratiya müdafiəçilərindən ibarət bir qrup Obama administrasiyasını “İlham Əliyev hökumətinə güvənməməyə” çağırıb.  Bu, Ağ Ev rəhbərinin məktubunun Azərbaycan prezidentinin saytında dərc edilməsindən bir neçə saat sonra baş verib. Belə ki, məktubda ABŞ prezidenti İ.Əliyevi üçüncü müddətə prezidentliyə başlaması münasibətilə təbrik edib. 

“Bu təbriklər öz-özlüyündə problem əlamətidir”, - AZAD (Amerika azərbaycanlıları demokratiya uğrunda) cəmiyyətinin sədr müavini Qorxmaz Əsgərov deyib.  “Təsəvvür edin ki, sizin doğum gününüzdür, amma kimsə sizi bir aydan sonra təbrik edir”, - o əlavə edib. 

AZAD bu vəziyyətin, həmçinin Azərbaycanda insan hüquqlarının və demokratiyanın pozulması ilə bağlı müzakirələr təşkil edib.

Əsas məruzəçilər İnsan Haqları Evinin rəhbəri və Art for democracy layihəsinin koordinatoru Rəsul Cəfərov, 

Art fo democracy layihəsinin direktoru Rebekka Vinsent, postkommunist ölkələrinin demokratikləşməsi məsələləri üzrə tanınmış ekspert İrena Lasota olub.

Tədbirdə çıxış edən AZAD-ın rəhbəri Elmar Şahtaxtinski və digər natiqlər deyiblər ki, Azərbaycanın gələcəyini azərbaycanlılar özləri həll edəcəklər, lakin ölkədə vəziyyətin pisləşməsi Qərbi və ABŞ-ı demokratiya və insan hüquqları məsələsinin prioritetliyini etiraf etməyə məcbur edəcək.

Demokratiya ilə bağlı vəziyyətin pisləşməsi və korrupsiya ilə əlaqədar Azərbaycanın Qərbin stabil tərəfdaşı olması sual altında qalır. 

“Azərbaycan özünü hər vəchlə təqdim etməyə çalışdığı kimi etibarlı tərəfdaş deyil”, - R.Vinsent vurğulayıb.

Bakı BMT, Avropa Şurasına daxil olarkən və bir sıra beynəlxalq sənədləri ratifikasiya edərkən üzərinə götürdüyü insan hüquqları sahəsində öhdəliklərini yerinə yetirmir.

Azərbaycan hökuməti sistematik olaraq insan hüquqlarını pozur, beynəlxalq tənqidə məhəl qoymur ki, bu da hakimiyyətin demokratik normaları və insan hüquqlarını təmin etməkdə maraqlı olmadığından xəbər verir, R.Cəfərov qeyd edib. Əslində hökumət cəmiyyətdə özünüsenzura atmosferi yaratmaq məqsədilə başqa istiqamətdə fəaliyyət göstərir.

Söz azadlığından danışan Vinsent xatırladıb ki, Azərbaycanda 140 siyasi məhbusdan 9-u jurnalist, biri blogerdir. Yeni tendensiya odur ki, artıq jurnalistləri öz işlərinə görə yox, xuliqanlığa, narkotik maddə saxlamağa, vergidən yayınmağa, terrorizmə və s. görə həbs edirlər.

“Bu, təqiblərin siyasi motivli olduğunu gizlətmək məqsədilə edilir”, - o vurğulayıb.

Dövlət elektron KİV-ə tam nəzarət etdiyindən İnternet yeganə ümid olaraq qalır, lakin burada da vəziyyət pisləşir. “Hökumət tənqidi fikirlərini ifadə etmək üçün İnternetdən istifadə edənləri cəzalandırmaqdan ötrü addımları davam etdirir.  Bütün bunlar belə deməyə əsas verir ki, dövlət başçısı xalqın iradəsinə uyğun olaraq qanuni şəkildə idarə etdiyini bildirsə də, əslində bu, belə deyil”, - Q.Əsgərov vurğulayıb.

“İlham Əliyev Azərbaycanı Türkmənistana çevirməyə çalışır və məsələ də budur ki, Əliyevin Qərb ölkələri ilə əməkdaşlığından nə gözləmək olar. Vaşinqton öz dəstəyini davam etdirməli və optimist olmalı, insanlarla daha yaradıcı əməkdaşlıq yolları tapmalıdır”, - Vinsent qeyd edib.

ABŞ-ın Azərbaycandakı keçmiş səfiri Riçard Kozlariç auditoriyaya müraciət edərək deyib ki, iqtisadi duruma daha çox diqqət yetirmək lazımdır: sərvətin ədalətli bölgüsünə, iqtisadi islahatların vacibliyinə. Prezidentin 85% səslə seçildiyi rejimlər “çox həssasdır”, Kozlariç hesab edir. 

“Azərbaycanın iqtisadi durumuna baxsaq görərik ki, neft hasilatı azalır, rejim indiyədək əldə etdiyi gəlirlərlə yaşamağa adət etməli olacaq”, o vurğulayıb. -25V-