Rüfət Səfərov “dələduzluq” və “xuliqanlıq”da şübhəli bilinir (yenilənib)

Hüquq müdafiəçisi Rüfətu Səfərova şübhəli şəxs qismində saxlanılıb.

Ona qarşı  Azərbaycan Cinayət Məcəlləsinin 178.3.2 (dələduzluq,külli miqdarda ziyan vurmaqla törədildikdə) və 221.1-ci (xuliqanlıq) maddələri ilə cinayət işi açılıb. Bu barədə  Turan-a onun vəkili Bəhruz Bayramov bildirib.

O qeyd edib ki, R.Səfərov özünü təqsirli bilmir və hesab edir ki, insan haqları sahəsində fəaliyyətinə və ABŞ Dövlət Departamenti tərəfindən insan hüquqları sahəsində mükafata layiq görüldüyünə görə təqib olunur. Bu maddələrə əsasən Səfərovu 10 ilə qədər azadlıqdan məhrum etmə cəzası gözləyir.

***

2024-12-03 21:52

Rüfət Səfərov saxlanılmasını ABŞ-da insan hüquqları sahəsində mükafata layiq görülməsi ilə əlaqələndirib (yenilənib)

“Rüfət Səıfərov bildirdi ki, ABŞ Dövlət Departamenti tərəfindən insan hüquqları sahəsində mükafata layiq görülüb. İki gün sonra mükafat ABŞ Dövlət katibi Antoni Blinken tərəfindən ona təqdim ediləcəkdi. Azərbaycan hökuməti bundan xəbər tutdu]una görə bu cinayət işlini düzüb-qoşub”.

Bu barədə “Müdafiə Xətti” hüquq müdafiə təşkilatının icraçı direktoru Rüfət Səfərovla hazırda saxlanıldığı Binəqədi Polis İdarəsində görüşündən sonra vəkil Elçin Sadıqov bildirib.

Onun sözlərinə görə, Rüfət Səfərovu polis əməkdaşları saxlayaraq birbaşa Binəqədi Rayon Polis İdarəsinə gətirib.

“Rüfət dedi ki, avtomobilini qarajda saxlayarkən tanımadığı bir şəxs ona hücum edib. O indi işdə şahid qismində çıxış edəcək. Həmin şəxs şikayətində bildirib ki, Rüfət Səfərovun atasından təxminən 58 min manat verərək torpaq sahəsinin yarısını alıb. Torpağın ikinci hissəsini almaq üçün guya Rüfətə də pul verib. Rüfət isə dedi ki, həmin şəxsi görməyib və tanımır. Hazırda dindirmə davam etdirilir”, vəkil qeyd edib.

Vəkil hesab edir ki, dindirmə formal xarakter daşıyır, hüquq müdafiəçisinə qarşı cinayət işi açacaqlar.  

Rüfət Səfərovun anası Tahirə Tahirqızı isə oğlunun saxlanmasını onun insan haqları ilə bağlı mükafata layiq görülməsi ilə əlaqələndirib.

“Bu torpaq alqı-satğısı şər-böhtandır. Rüfət adına hər hansı torpaq sahəsi yoxdur. Hamıya sirr deyil ki, Rüfət oğru dedyil, rüşvətxor deyil. O insan hüquqlarının müdafiəçisidir. Saxlanılmasının səbəbi də budur”, o qeyd edib.

Dekabrın 3-də "Müdafiə Xətti" hüquq müdafiə təşkilatının icraçı direktoru Rüfət Səfərov saxlanılıb.

Zərdab Rayon Prokurorluğunun müstəntiqi olan Rüfət Səfərov 2015-ci ilin sonunda Azərbaycan hakimiyyətini insan haqlarının pozulmasında və ölkədə qanunsuzluqlarda ittiham etdikdən sonra istefaya çıxıb. O bundan sonra rüşvət almaq ittihamı ilə həbs edilib. 2016-cı ilin sentyabrında Lənkəran Ağır Cinayətlər Məhkəməsinin qərarı ilə 9 il müddətinə azadlıqdan məhrum edilib. Keçmiş müstəntiq ona qarşı irəli sürülən ittihamları rədd edib. O 2019-cu ildə əfv sərəncamı ilə azadlığa çıxıb.

2020-ci ilin iyulunda bir qrup hüquq müdafiəçisi tərəfindən “Müdafiə Xətti” hüquq müdafiə təşkilatı təsis edilib. Səfərov bu təşkilatın icraçı direktorudur və ölkədə insan hüquqlarının müdafiəsi sahəsində çoxsaylı tənqidi hesabatların müəllifidir.  
 

* * *

2024-12-03 18:08

Səfərov dəllalın şikayəti əsasında saxlanılıb? (yenilənib)

Daxili İşlər Nazirliyi hüquq müdafiəçisi Rüfət Səfərovun saxlanılmasının səbəbləri ilə bağlı Turan-ın sorğusuna cavab verib.

DİN Mətbuat Xidmətindən bildirilib ki, “torpaq alqı-satqısı ilə əlaqədar Rüfət Səfərovla bir nəfər arasında münaqişə olub. Bununla bağlı araşdırma aparılır”.

* * *

Hüquq müdafiəçisi Rüfət Səfərov saxlanılıb

Dekabrın 3-də axşam  mülki geyimli şəxslər hüquq müdafiəçisi Rüfət Səfərovu saxlayıblar. Onun atasının dediklərinə görə, Rufat evə qayıdarkən saxlanılıb. Onu kimin və  hansı səbəbdən saxladığı, harada olduğu hələ məlum deyil.

Rüfət Səfərov öz hüquq- müdafiə fəaliyyətinə görə beynəlxalq mükafata layiq görülüb və mükafatı almaq üçün dekabrın 6-da ABŞ-a getməliydi.

Daxili İşlər Nazirliyi Rüfət Səfərovun saxlanılmasının səbəblərilə bağlı Turan-ın sorğusuna hələlik cavab verməyib.