Hüquq müdafiəçisi siyasi məhbusların əfvini müsbət qiymətləndirir

Azərbaycan Hüquq-Müdafiə Təşkilatlarının Monitorinq Qrupu (AHMTMQ) prezident İlham Əliyevin son əfv fərmanını müsbət qiymətləndirir və bunu siyasi məhbuslar probleminin həllində mühüm addım hesab edirlər. 

“Hesab edirik ki, bu, AŞPA-nın yanvar sessiyasında lazımınca qiymətləndiriləcək. Belə ki, Azərbaycan üzrə iki sənədin müzakirəsi gözlənilir”,- İnsan Hüquqları və Qanunçuluğun Müdafiəsi Bürosunun rəhbəri Səidə Qocamanlı Turan-a bildirib.

O qeyd edib ki, əfv olunanlar arasında AŞPA-nın siyasi məhbuslar üzrə məruzəçisi Kristofer Ştrasserin hesabatında adları çəkilən 14 nəfər var.

Onlar iki nəfər “vicdan məhbusu” -  Vidadi İsgəndərli və Şahin Həsənli, iki jurnalisti Anar Bayramlı, Aydın Canıyev, , hüquq müdafiəçisi Taleh Xasməmmədov,  7 dindar - Azər Cəbiyev, Fəxri İlyasov,  Məmməd  Əsgərov , Zaur  İsgəndərov,  İlqar  Musayev və Araz İsmayılov,  Ceyhun  Fərzullayev (Nemət Pənahlının işi üzrə həbs olunub),  Məmmədəli Əliyev (Abşeron Polis İdarəsinin sabiq rəisi, Şəmsi Abdullayev (XTPD)

S.Qocamanlının sözlərinə görə, bundan əvvəl Ştrasserin siyahısından daha 18 nəfər siyasi, mülki fəal və jurnalist azad edilib.

Bundan əlavə, bir ay əvvəl digər “hicab məhbusları” – Rəşad Vəliquliyev və Taleh Bağırov şərti azadlığa buraxılıblar. “Qarabağ partizanları” siyahısında olan Rövşən Bədəlov azadlığa çıxıb.

Fevralda Kamran Kərimov (“Sadval” separatçı hərəkatın üzvü. 1999-cu ildə sərhədçilərə silahlı hücumda ittiham olunaraq 14 il müddətinə azadlıqdan məhrum edilib) vaxtından əvvəl ərti azadlığa buraxılıb.  

Ştrasserin siyahısından digər bir nəfər İslam Partiyasının sədr müavini  Vaqif Abdullayev vəfat edib.

Beləliklə, Ştrasserin 85 nəfərlik siyahısından 48 nəfər həbsdə qalır. Onların bəzisinin məhkəməsi hələ başa çatmayıb (jurnalistlər Əvəz Zeynallı, Zaur Quliyev, Vüqar Qonaqov) və ya onlar hələ məhkəmə qarşısında dayanmayıblar (Əli Kərimlinin qaynı Elnur Seyidov).

19 nəfər 1995-ci ildə XTPD-nin qiyamı və 1994-cü ildə dövlət çevrilişinə cəhdə görə ömürlük mühakimə olunublar.  

S.Qocamanlı qeyd edib ki, AHMTMQ həmin işlər üzrə parlament səviyyəsində qərarın qəbuluna tərəfdardır. 

Qeyd edək ki, bu şəxslər ölüm hökmünə məhkum olunmuşdular. Ölüm hökmünün ləğvindən sonra bu, ömürlük həbs cəzası ilə əvəzlənib. Hökm çıxarıldığı anda ölüm hökmünə alternativ kimi 15 il azadlıqdan məhrumetmə idi, odur ki, bu adamlar hesab edirlər ki, artıq cəzalarını çəkiblər.

AHMTMQ hesab edir ki, belə qərar parlament tərəfindən qəbul oluna bilər və bu zaman  nəzərə almaq lazımdır ki, həmin şəxslər çox illərini həbsdə keçiriblər, onların arasında yaşlılar və xəstələr var. 

S.Qocamanlının sözlərinə görə, prezidentin son fərmanları ilə  AHMTMQ-nin siyahısından 4 nəfər azad edilib və 6 nəfər isə həbsdə qalr – Fərhad və Rafiq Əliyev qardaşları, Əli İnsanov, Nemət Pənahlı, Şəmsi Səmədzadə (biznesmen) və Dəyanət Kərimov (XTPD işi). 

Bundan əlavə AHMTMQ istintaq altında olan və ya məhkəmə qarşısında dayanan Müsavat Partiyasının fəalı Nigar Yaqublunu, jurnalistlər Əvəz Zeynallı, Hilal Məmmədov, Vüqar Qonaqov və Zaur Quliyevi potensial siyasi məhbus hesab edir.

“Biz ümid edirik ki, Azərbaycanın 2014-cü ildə Avropa Şurası Nazirlər Komitəsində sədrliyinə kimi siyasi məhbuslar məsələsi qapanacaq”, - S.Qocamanlı vurğulayıb.—06B-