İctimai birlik ABŞ-ı nazirə adekvat münasibət bəsləməməkdə ittiham edir

“Ehtiyatda və İstefada olan Zabitlər Birliyi”nin sədri Yaşar Cəfərli ABŞ rəhbərliyinə müraciət ünvanlayıb. 

Müraciət bu yaxınlarda ABŞ-a səfər etmiş müdaifə naziri Səfər Əbiyevin ABŞ rəhbərliyi tərəfindən qəbul olunmasına etiraz notu üzərində köklənib. Belə qəbulun qurum üzvlərinin təəccübünə səbəb olduğu vurğulanır. 

Müraciətdə S.Əbiyevin 19 ildir ki, müdafiə naziri postunu tutduğu xatırladılır. Nazir bu 19 ildə hərbiçilərin, hərbiçi ailələrinin hüquqlarını pozan, onlara külli maddi ziyan vuran, qanunların tələbini pozan qərar və əmrlər verməkdə ittiham edilir. Buna sübut kimi S.Əbiyevin döyüş bölgəsində xidmət edən hərbi qulluqçulara 3 qat əmək haqqının 2 qat əmək haqqı ilə əvəzlənməsi barədə 1998-ci ildə qanuna zidd əmr imzalaması göstərilir. Bu qanunsuz əmr 7 il qanuna zidd olaraq qüvvədə qalıb. 7 ildən sonra isə qanunun tələbi nazirin əmrinə uyğunlaşdırılıb. Bu 7 ildə hüquqlarını məhkəmə qaydasında bərpa etmək istəyən hərbiçilərin iddiaları birmənalı şəkildə rədd edilib. Nazir hüquqi qüvvəyə minən 20 məhkəmə qərarını icra etməməkdə ittiham olunur.    

Nazirin ordu generallarının zabit və gizirlərin yerdəyişməsinə (həmçinin növbəti rütbə verilməsinə) dair ordu generallarının qanunla nəzərdə tutulmuş səlahiyyətlərini məhdudlaşdırmaqda, bəzən isə məhdudlaşdırılmış səlahiyyətləri də bəzi generalların əlindən almaqda ittiham edilir. Müraciətdə nazirin Ali Baş Komandanının qanunla nəzərdə tutulan səlahiyyətlərinə müdaxilə edərək, ştat kateqoriyası “general” rütbəsinə uyğun olan vəzifələrə əmrlərlə təyinat verdiyi göstərilir. 

Zabitlərə növbəti rütbə və ya vəzifə verilməsində hər-hansı ümumi mexanizm yoxdur, nazirin baxışına görə bunlar edilir, nəticədə korrupsiyaya münbit şərait yaradılır. Hərbi Akademiyaya qəbul zamanı belə aşkarlıq, rəqabətlik, sağlam yarış prinsipləri pozulur. 

Müdafiə naziri media, vətəndaş cəmiyyətinə, tənqidçilərinə qarşı kampaniya aparmaqda, “kompromatlar” toplamaqda, fiziki zor tətbiq olunmasının təşkilində təqsirli bilinir. Belə zorakılıq hallarına dair sübutlardan birinin hazırda məhkəmə baxışında olmasına diqqət çəkilir. S.Əbiyevin özünü müdafiə üçün qeyri-hökumət qurumları yaratması nəzərə çatdırılır. Bu məsələnin  ictimailəşdirildiyi, problemin həllinə kömək üçün ABŞ səfirliyinə müraciət olunduğu qeyd edilir. Nazirin qanunsuz əməllərini bu gün də davam etditdiyi vurğulanır. 

Dünyanın hər yerində insan haqları və qanunların aliliyinə hörmət tələb edən ABŞ kimi bir dövlətin qanunların aliliyini, insan haqlarını, söz və fikir azadlığını açıq-aşkar pozan S.Əbiyevi səfərə dəvət etməsi, onun şərəfinə təntənəli qarşılama mərasimi təşkil etməsinin başa düşülən olmadığı deyilir. 

Son olaraq, ABŞ tərəfdən qurumun bu səfərlə əlaqəli avuqstun 7-də yaydığı bəyanata münasibət bildirməsi, ABŞ tərəfin qanunları pozan nazirə adekvat münasibət bəsləməsi xahiş edilir. -05D-