İctimai Palata Naxçıvanda kütləvi tədbirlərə hazırlaşır

İctimai Palatanın (İP) Naxçıvan bölməsi bu günlərdə növbəti yığıncağını keçirib. 

Yığıncaqda təşkilati məsələyə baxılaraq 17 yeni üzvün qəbulu təsdiqlənib.  Naxçıvandakı ictimai-siyasi durum müzakirə edilib. Ölkədə çox həssas bir siyasi dövrün başlandığı, bütün müxalif qüvvələrin bir araya gələ bilməsinin  hakimiyyət dəyişkiliyi üçün şans yaratdığı vurğulanıb. Siyasi qüvvələrin bir mərkəzdə birləşməsinin izdihamlı kütləvi aksiyalar keçirməyə imkan verəcəyi qeyd edilib. 

Naxçıvanda ictimai-siyasi durumun getdikcə ağırlaşması nəzərə çatdırlıb.  Son zamanlar Naxçıvanda yerli iqtidar əleyhinə yayılan vərəqələrdən sonra bölgədə elan olunmamış fövqəladə vəziyyətin hökm sürməsinə diqqət çəkilib. Qeyd olunub ki, gecə saat 23:00-dan sonra küçədə adamlar saxlanılır, telefon nomrələri,  kimlikləri qeydə alındıqdan sonra buraxılır.  Bütün küçə və dalanlarda kameraların olmasına baxmayaraq, hər küçədə mülki geyimli iki nəzarətçi keşiş çəkir. Naxçıvan iqtidarı əleyhinə vərəqələr yayılması haqda iddialar olsa da həmin vərəqələri görən yoxdur. 

Toplantıda vərəqələrlə bağlı məsələnin şayiə olaraq yayılması, sakinlərə psixoloji basqının olması ehtimal edilib. Digər variant kimi bu tipli vərəqələrin yayılması iqtidardaxili qruplaşmalardan birinin işi kimi dəyərləndirilib. 

Son vaxtlar ictimai-siyasi fəallara və jurnalistlərə qarşı təzyiqlər də müzakirə edilib. Bu basqılar pislənilib, yerli iqtidara və saxta parlamentə etiraz olaraq yaxın zamanlarda kütləvi aksiyalara başlamaq qərarı qəbul edilib. Kütləvi tədbirlərin yeri, vaxtı və forması ilə bağlı Koordinasiya Şürasının iclasında  qərar qəbul olunacağı bildirilib. Naxçıvanda İP-nin tərkibi genişləndikcə toplantıların keçirilməsi çətinləşir. Siyasi partiyaların ofisləri çox geniş olmadığı üçün toplantılara məhdud sayda adam qatıla bilir. -05D-