İ.Əliyev Qərbin enerji layihələrini dəstəkləməsini əhəmiyyətli sayır

İlham Əliyevin komanda üzvlərinin qərb əleyhinə ritorikasına baxmayaraq, Azərbaycan prezidenti özü bu gün Qərb dövlətləri ilə əməkdaşlığın Azərbaycan üçün əhəmiyyətini vurğulayıb.

Ənənəvi Caspian Oil and Gas sərgisinin açılışında çıxış edən prezident bildirib ki, 21 il əvvəl bu tədbirin keçirilməsi dünyanın diqqətini müstəqil Azərbaycana çəkən ilk mühüm addım olub.

Onun sözlərinə görə, ABŞ və Böyük Britaniya dövlət və hökumət başçılarının ənənəvi olaraq sərgi iştirakçılarına salamlarını göndərməsi sərginin əhəmiyyətini daha da artırır.

“Azərbaycanın son illər əldə etdiyi uğurlara tərəfdaşlarla birgə nail olunub”, deyə İlham Əliyev qeyd edib.

Məhz ilk sərgidən bir neçə ay sonra Azərbaycanın bugünki uğurlu inkişafını əhəmiyyətli dərəcədə müəyyən edən “Əsrin müqaviləsi” imzalanıb, deyə Əliyev sözünə davam edib.

“Bu gün o vaxt bizə inanan, bizimlə işləmək istəyini bildirən bütün şirkətlərə, investorlara minnətdarlığımı bildirmək istəyirəm. Onlar bizə, Azərbaycanın sabit, uğurlu gələcəyinə inandılar, bizim yanımızda oldular və bugünki gerçəklikləri bizimlə birlikdə təmin etdilər”, deyə Əliyev bildirib.

Onun sözlərinə görə, Azərbaycan özünü etibarlı tərəfdaş kimi sübut edib.

“Bizim sözümüz də imzamız qədər dəyərlidir. Biz həmişə verdiyimiz vədlərə sadiq olmuşuq”, deyə Əliyev bildirib.

Regional layihələrin həyata keçirilməsinə toxunan prezident bildirib ki, Azərbaycan ziddiyyətlərin olmaması və hər bir tərəfin yalnız mənfəət əldə etməsi üçün istehsalçıların, tranzit ölkələrin və istehlakçıların maraqlarını əlaqələndirməyə çalışır. -06D-