Obama Rusiyadan müdafiəyə milyard ayıracaq

Qərb və Rusiya arasında Ukrayna ilə bağlı gərginliyin artması ilə əlaqədar ABŞ prezidenti Barak Obama Şərqi Avropanın təhlükəsizliyinin möhkəmləndirilməsinə bir milyard dollar ayırmağı vəd edib. “Avropanın təkrar sığortası üzrə təşəbbüslər” çərçivəsində ayrılacaq bu vəsaitlə Şərqi Avropanın “yeni ittifaq ölkələrində ABŞ HHQ, HDQ və quru qoşunlarının əlavə hərbiçilərinin iştirakı maliyyələşdiriləcək, deyə Obama çərşənbə axşamı Varşavaya səfəri zamanı bildirib.

Amerika prezidentinin sözlərinə görə, bu vəsait həmçinin ABŞ və NATO-nun Şimali Atlantika Alyansına daxil olmayan Ukrayna, Gürcüstan və Moldova kimi ölkələrlə əməkdaşlığı gücləndirməyə və bu dövlətlərin silahlı qüvvələrini möhkəmləndirməyə imkan verəcək. Bir müddət əvvəl Obama artıq Polşanı və digər Şərqi Avropa ölkələrini ABŞ-ın dəstəyinə inandırıb. Varşavaya gələn prezident bu ölkələrin təhlükəsizliyinin təmin edilməsini Amerikanın müqəddəs borcu “və öz təhlükəsizliyimizin mühüm nöqtəsi” adlandırıb, xəbəri AFP agentliyi yayıb.

NATO-nun baş katibi Anders Foq Rasmussen Barak Obamanın planlarını alqışlayıb. “Mən Şərqi Avropa dövlətlərinin təkrar sığortalanmasında ABŞ-ın liderliyini dəstəkləyirəm”, deyə o, Brüsseldə bildirib. Foq Rasmussen qeyd edib ki, ABŞ Ukraynada Rusiyanın “qanunsuz hərbi əməliyyatlarına” tez reaksiya verdi. Baş katib əlavə edib ki, bundan sonra da Ukrayna böhranının tənzimlənməsi işində Amerikanın rəhbər rolunu dəstəkləyəcək. -02D-