İ.Əliyev: Şaxtaxtinskini qaytarın, ATƏT-in ofisini yenidən açaq

Bakı/20.09.16/Turan: Azərbaycan prezidenti İlham Əliyev bu gün Aİ-Azərbaycan Parlamentlərarası Əməkdaşlıq Komitəsinin üzvlərini qəbul edib. Görüşdə Əliyev Avropa Parlamentini Azərbaycana münasibətdə qərəzli olmaqda ittiham edib və ölkədə insan hüquqlarının pozulduğunu bəyan edən digər Qərb qurumlarını tənqid edib.

Azərbaycan prezidentinin Avropa Parlamenti nümayəndələri ilə görüşü haqqında rəsmi məlumata əsasən, Əliyev bir il əvvəlki hadisələri – Avropa Parlamentinin Azərbaycanın ünvanına tənqidi qətnamə qəbul etməsindən sonra tərəflər arasında parlament əlaqələrinin faktiki olaraq dayandırıldığını yada salıb.

Əliyevin sözlərinə görə, hazırki görüş “bir çox məsələlərə aydınlıq gətirmək və gələcək işlərimizi planlaşdırmaq üçün çox açıq müzakirələrin aparılması baxımından yaxşı imkan olacaq”.

“Çünki təəssüf ki, Avropa Parlamentinin bir il bundan əvvəl qəbul etdiyi qətnamə bizim münasibətlərimizdə ciddi geriləmə yaratdı”. Əliyev qətnaməni “düşməncəsinə, qeyri-düzgün, səhv informasiya və qərəzə əsaslanan addım və ölkəmizin reputasiyasına zərər vermək cəhdi” adlandırıb.

O, son beş ildə Azərbaycanda insan hüquqları ilə bağlı vəziyyətin pisləşdiyi tezisi ilə razılaşmayıb.

Xüsusən, Əliyev jurnalistlərin və vətəndaş cəmiyyəti nümayəndələrinin ardıcıl olaraq təqiblərə məruz qaldığı barədə iddianı təkzib edib. O, həmçinin Meydan TV direktoru Emin Millinin ölümlə hədələndiyi haqqında məlumatı təkzib edib.

9 ay həbs ediləcəyindən ehtiyatlanaraq, İsveçrənin Bakıdakı səfirliyində qaldıqdan sonra bu ölkədən sığınacaq alan hüquq müdafiəçisi Emin Hüseynovun vətəndaşlıqdan məhrum edilməsinə gəlincə, Əliyevin sözlərinə görə, fəal özü ona Azərbaycan vətəndaşlığından çıxdığı barədə müraciət yazıb.

Əliyev deyib ki, hüseynov ölkəni Azərbaycan və İsveçrə XİN arasında razılaşma əldə olunduqdan sonra tərk edib.

Dövlət başçısı 2006-cı ildən Bakının mərkəzində mitinqlərin qadağan edildiyini də inkar edib. Onun iddiasına görə, müxalifətin Bakının mərkəzində mitinq keçirmək imkanı var. Əliyevə görə, “Bakının mərkəzində müxalifət azad şəkildə mitinqlər keçirib. Onlar bir neçə yüz adam toplayıblar”.

Prezident həmçinin jurnalist Rasim Əliyevin internetdə sosial şəbəkələrdə Azərbaycan dövlət başçısını tənqid etməsi ilə əlaqədar hədələndikdən sonra oldürüldüyü haqqında iddialara da münasibət bildirib.

Əliyevin sözlərinə görə, jurnalist tənqid etdiyi futbolçunun qohumları və fanatları tərəfindən döyüldükdən sonra xəstəxanada faciəvi şəkildə dünyasını dəyişib.

Əliyev Azərbaycanın Aİ ilə strateji tərəfdaşlıq münasibətlərini genişləndirməkdə və dərinləşdirməkdə maraqlı olduğunu bildirib. Aİ də bunda maraqlıdır. Buna görə, Əliyev hesab edir ki, bu cür qətnamələr tərəflər arasında əməkdaşlığın mahiyyətini əks etdirmir.

Əliyev 2015-ci ildə Bakıda ATƏT ofisinin bağlanması məsələsinə də toxunub.

Əliyevin sözlərinə görə, bunun səbəbi ABŞ-ın ATƏT-dəki daimi nümayəndəsi Bayerin müdaxiləsindən sonra ATƏT-in Bakı ofisinin rəhbəri Aleks Şaxtaxtinskinin vəzifədən azad edilməsi olub.

Əslən Azərbaycanlı olan Fransa vətəndaşı Şaxtaxtinski bu vəzifədə cəmi bir il işləyib. Əliyevin fikrincə, Şaxtaxtinskinin vəzifəsindən kənarlaşdırılmasının səbəbi onun kabinetində Azərbaycan prezidenti ilə fotoşəklinin olması olub.

Əliyev qeyd edib ki, ABŞ-ın Fransa hökumətinə təzyiqi ilə Şaxtaxtinski ATƏT-in Bakı ofisinin rəhbəri vəzifəsindən azad edilib, onun karyerasına son qoyulub, o, Fransa XİN-dən qovulub.

“Əgər ABŞ-ın ATƏT-dəki nümayəndəsinin fikrincə mənimlə şəkil çəkdirmək cinayətdirsə biz nədən danışa bilərik?! Mən nə dedim? Mən dedim ki, əgər Şahtaxtinski işdən azad olunsa ofis bağlanacaq. Mən onlara xəbərdarlıq etdim, onlar qulaq asmadılar və biz bunu etdik. İndi onlar ofisin fəaliyyətini bərpa etmək istəyirlər. Mən şərt qoydum. Şahtaxtinskini geri qaytarın, ədaləti, onun karyerasını bərpa edin və o zaman biz ofisi yenidən açarıq”, deyən liyev Avropa Parlamentinin Azərbaycanla bağlı qətnaməsinin ATƏT-in Bakı ofisinin heç bir izahat verilmədən bağlandığı haqqında bəndi ilə razılaşmadığını bildirib.

Əliyev “Freedom House”un tənqidini təkzib edərək, bu təşkilatı erməniyönlü adlandırıb.

Azərbaycan prezidenti Avropa Parlamentinin qətnaməsini Azərbaycana “nifrət edən” parlament rəhbərləri Şults və Lunaçekin fəaliyyətinin nəticəsi hesab edir.

Əliyevə görə, Azərbaycan “heç nə itirməyib” və Avropa Parlamentinin qətnaməsinə cavab olaraq Milli Məclisdə Aİ ilə əlaqələr üzrə işçi qrup yaratmayıb, Avronest PA-dakı fəaliyyətini dayandırıb.

“Vəziyyət belədir. Biz heç nə olmamış kimi davrana bilmərik. Biz buna aydınlıq gətirməliyik. Biz bunu aradan qaldırmaq üçün nə edə biləcəyimizə nəzər salmalıyıq. Əgər bu, belə qalsa və heç nə baş verməsə biz nə barədə danışa bilərik?”, deyə Əliyev qeyd edib.

Deputatlar - Böyük Britaniyadan Sayyad Kərim, Finlandiyadan Heydi Hautala, Rumıniyadan Ramon Manesku Azərbaycanın Aİ üçün əhəmiyyətini qeyd ediblər.

Öz növbəsində, Əliyev deyib ki, Avropa Parlamenti ilə münasibətlərdə böhrana baxmayaraq, Azərbaycan Aİ ilə əlaqələri inkişaf etdirib.

Bununla belə, Əliyev Avropa Parlamentinin Azərbaycanın ərazi bütövlüyünə və suverenliyinə dəstəyini yüksək qiymətləndirib.

Görüş zamanı viza rejiminin sadələşdirilməsi və qarşılıqlı maraq doğuran digər məsələlər müzakirə olunub. -06D-