İlham Əliyev Aİ nümayəndə heyəti ilə regionda müharibədən sonrakı bərpa məsələlərini müzakirə edib

Bakı/25.06.21/Turan: Avropa İttifaqı və onun üzvlərinin regional məsələlərə cəlb olunmasının yaxşı göstəricisidir. Bu barədə dövlət başçısı İlham Əliyev  cümə günü Rumıniya, Avstriya, Litva xarici işlər nazirlərini və Avropa İttifaqının nümayəndələrini qəbul edərkən bildirib.

Nümayəndə heyəti Aİ-nin təhlükəsizlik və xarici siyasət məsələləri üzrə nümayəndəsi Cozef Borelin mandatı əsasında Cənubi Qafqaz ölkələrinə regional turne həyata keçirir.

“Mən başa düşdüyüm qədərilə sizin regiona səfəriniz Ermənistanla Azərbaycan arasında münaqişədən sonra yaranmış hazırki vəziyyətə həsr olunub. Başqa sözlə desək, postmünaqişə vəziyyəti əhəmiyyət kəsb edir, çünki düşünürəm ki, indi – bu il və gələn il ərzində postmünaqişə vəziyyəti ilə bağlı əsas fundamental yanaşmalar işlənib hazırlanacaq”, deyə Əliyev bildirib.

“Azərbaycanın mövqeyi çox açıq və aydındır. Mən artıq dəfələrlə bu barədə danışmışam ki, biz postmünaqişə vəziyyətindən Cənubi Qafqazda sülhməramlı inkişafa və əməkdaşlığa keçmək istəyirik. Əfsuslar olsun ki, biz indiyədək Ermənistan hökumətindən buna bənzər nə isə eşitməmişik”, deyə o sözünə davam edib.

Əliyev Ermənistandakı seçkilərdən sonra müsbət siqnallar olacağına ümid etdiyini ifadə edib. “Çünki əgər bizim Ermənistanla sülh sazişimiz olmasa, bu, o deməkdir ki, sülh də yoxdur. Təkcə iki ölkə arasında deyil, həm də Cənubi Qafqazda sülh yoxdur”, deyə Əliyev bildirib.

O, Ermənistan rəhbərliyinin destruktiv hərəkətlərini və nizamlanma üçün real addımlar atmayan ATƏT-in Minsk Qrupunun mövqeyini tənqid edib.

Bugünki vəziyyətə toxunan Əliyev təkrar edib ki, münaqişə həll edilib və artıq müzakirə ediləcək heç nə yoxdur.

Rumıniyanın xarici işlər naziri Boqdan Auresku cavab sözündə bildirib ki, üç xarici işlər nazirinin, Aİ-nin Xüsusi Nümayəndəsinin və Aİ-nin Xarici Siyasət Xidmətinin əməkdaşlarının səfəri mayda Lissabonda Aİ ölkələrinin xarici işlər nazirlərinin görüşündə qəbul edilmiş qərarın nəticəsidir. “Sözügedən görüşün sonunda biz qərara gəldik ki, Avropa İttifaqı regionla daha yaxından məşğul olmaq, münaqişələrin həllində iştirak etmək, postmünaqişə dövründə inkişaf proseslərinə cəlb olunmaq istiqamətində səylərini artırmaq niyyətindədir”, deyə Auresku qeyd edib.

Azərbaycan Aİ üçün mühüm rol oynayır və energetika, ticarət məsələlərində strateji tərəfdaşdır, Avropa İttifaqının ən çox sərmayə yatırdığı ölkədir.

“Münaqişədən sonrakı dövr üçün proseslərdən danışarkən Sizin fikirlərinizi öyrənmək istərdik. Bildiyiniz kimi, biz buradan Ermənistana, oradan isə Tbilisiyə səfər edəcəyik. Yəni, etimad quruculuğu, yenidənqurma, vəziyyətin sabitləşdirilməsi kimi sahələrdə biz nə edə bilərik?”, deyən nazir əlavə edib ki, Aİ əsirlərin azad edilməsini və mina xəritələrinin təqdim olunmasını alqışlayır. “Biz belə prosesləri gələcəkdə dəstəkləməkdə maraqlıyıq”, deyə Auresku bildirib.

Avstriya XİN başçısı Aleksandr Şallenberq regionun müharibədən sonra sülh proseslərinə keçilməsinin önəmini qeyd edib. Avropa İttifaqı regionun iqtisadi inkişafına böyük maraq göstərir və bu məsələdə ATƏT-lə əməkdaşlıq edir.

Litvanın xarici işlər naziri Qabrielius Landsbergis xatırladıb ki, bir neçə ay əvvəl Bakıya səfər edib və hazırki səfəri o zaman başlamış məsləhətləşmələrin davamı kimi qiymətləndirir. -02D-