İlham Əliyev: Bu, növbəti hərbi cinayətdir

Bakı/06.07.17/Turan: Türkiyə prezidenti Rəcəb Tayyib Ərdoğan iyulun 6-da azərbaycanlı həmkarı İlham Əliyevə zəng edərək cəbhə bölgəsində iki azərbaycanlı mülki şəxsin qətlə yetirilməsi ilə bağlı başsağlığı verib.

Bu haqda prezidentin mətbuat xidməti xəbər verir.

İlham Əliyev telefon danışığı zamanı deyib ki, son olay Ermənistan silahlı qüvvələri tərəfindən Azərbaycanın dinc əhalisinə qarşı növbəti dəfə törədilmiş hərbi cinayətdir.

Ölkə başçısı vurğulayıb ki, dinc əhaliyə qarşı törədilən qanlı cinayət erməni vəhşiliyinin növbəti təzahürüdür. Hərbi cinayətə görə bütün məsuliyyət Ermənistanın siyasi rəhbərliyinin üzərinə düşür.

Telefon söhbəti zamanı iki ölkə arasındakı münasibətlərin müxtəlif aspektlərinin müzakirə edildiyi bildirilir.

Azərbaycanın Müdafiə Nazirliyinin məlumatına görə Ermənistan Silahlı Qüvvələri iyulun 4-də Füzuli rayonunun Alxanlı kəndini 82 və 120 millimetrlik minaatanlardan və dəzgahlı qumbaraatanlardan atəşə tutub.

Nəticədə iki dinc sakin həlak olub. Bunlar kənd sakinləri Sahibə Quliyeva və onun 2 yaşlı nəvəsi Zəhra Quliyevadır. Qəlpə yarası alan Sərvinaz Quliyeva isə hərbi hospitala çatdırılaraq əməliyyat olunub.--0--