İlham Əliyevi könüllü istefaya çağırıblar (YENİLƏNİB)

Müxalifətçi Milli Şuranın mitinqinə toplaşan 10 min nəfərdən çox adam Müsavat Partiyasının lideri İsa Qəmbərin İlham Əliyevə könüllü istefaya getməsi çağırışını alqışlarla qarşılayıb.

Buna qədərsə DİN-in keçmiş rəhbəri İsgəndər Həmidov bu səpgili çağırışında daha konkret olaraq “əgər Əliyev istefaya getməsə, istefaya göndəriləcək” ifadəsini işlədib. Milli Şuranın liderləri öz çıxışlarına əhali tərəfdən ciddi dəstək alıblar. 

“Bizim namizəd Cəmil Həsənli teledebatlardakı 12 dəqiqəlik çıxışında bu iqtidarın 20 ildə gördüyündən daha çox iş gördü”, - AXCP lideri Əli Kərimli vətəndaşları prezident seçkilərində ciddi fəallığa çağırıb. “Yalan, aldatmaq bəsdir, İlham getməlidir”, - Ə.Kərimli qeyd edib.  

EL hərəkatının rəhbəri Eldar Namazov C.Həsənlinin namizədlyini dəstəkləyən qərb bölgəsindən yenicə qayıtdığını bildirib. “İnsanlar mənə belə deyiridlər: “oktyabrın 9-da Cəmil Həsənliyə səs verəcəyik”,-E..Namazov nəzərə çatdırıb. 

Müsavat Partiyasının lideri İsa Qəmbər mitinqin  payız bərabərliyi günündə keçdiyini xatırladıb. “Bu,  həm də ölkənin avtoritarizmdən demokratiyaya keçid rəmzidir”, - o əlavə edib. Həm də müxalifətin namizədi C.Həsənlinin İlham Əliyevə rəqib olmaması əfsanəsini alt-üst etməsini vurğulayıb.

“İki prezidentlik müddətində İlham Əliyev ölkənin bir problemini belə həll edə bilməyib.Ona görə də onun könüllü istefa verməsi daha doğru olardı”, - o qeyd edib və iqtidarı gəililəri haqda hesabat verməyə çağırıb. Təkcə İlham Əliyev yox, Heydər Əliyev Fondu da hesabat verməlidir. Xalqa izah edilməlidir ki, bu ictimai təşkilatın milyonları haradan yaranır”, - Müsavat lideri vurğulayıb.  

Sonda çıxış edən Milli Şuranın prezidentliyə namizədi C.Həsənli çıxış edərək İlham Əliyevi birbaşa debatlara çağırıb. “Qoy,  o, burada səslənən suallara üzbəüz cavab versin, qoy, cavab versin ki, niyə 20 il ərzində 20 sm. torpağı azad etməyib”, - o vurğulayıb.  qeyd edib. Daha sonra C.Həsənli öz seçicilərinin mövqeyini ifadə edərək bu insanların total ədalətsizlikdən, bu hakimiyyətin hərislik və ikiüzlüllüyündən bezdiyini söyləyib.

“Avtoritar rejim ölkəni idarə edən kriminal piramida yaradıb. Amma bu iqtidar bununla kifayətlənmək istəmir, bu piramida bizim uşaqları da idarə etmək istəyir, buna isə yol vermərik”, -  C.Həsənli mövqeyini ifadə edib.

Onun çıxışı da digər natiqlərin çıxışları kimi “Azadlıq!”, “İstefa!” şüarları ilə müşayət olunub.  

Mitinqin 4 bənddən ibarət qətnaməsi oxunub. Qətnamədə bütün siyasi məhbusların azad olunması, şəffaf və demokratik seçkilərə şərait yaradılması, namizədlərə öz seçicilərilə görüşlərə imkan yaradılması, seçkiöncəsi təşviqatda İlham Əliyevin dövlət resurslarından istifadə edilməsinə son qoyulması tələb edilir.

Qeyd etmək lazımdır ki, son illərdə bu mitinq müxalifətin ən kütləvi və emosional mitinqi sayıla bilər.-06B-