İlhamiz Quliyev Umbakı həbsxanasında saxlanma şəraitinin pis olmasından şikayətlənib

Narkotik maddə işi üzrə mühakimə olunmuş fəal İlhamiz Quliyev Umbakıdakı penitensiar kompleksdə saxlanma şəraitinin pis olmasından şikayət edib. Bu barədə Turan-a onun yaxınları bildiriblər.

Dekabrın 20-də Quliyev zəng edərək deyib ki, həbsxana kompleksində istilik sisteminin olmasına baxmayaraq, kameralar isidilmir və məhbuslar gödəkcələrdə yatmağa məcbur olur, ancaq yenə də soyuqdur.

O, məhbuslarla bu cür rəftarın qəbuledilməz olduğunu bildirəndə mayor Ramin Əkbərovun təhdidlərinə məruz qalıb.

Bununla əlaqədar fəalın anası Ombudsman Aparatına və Ədliyyə Nazirliyinə şikayət edib.

Penitensiar xidmətdən isə bildiriblər ki,  Quliyev barəsində «qeyd edilən iddia həqiqəti əks etdirmir». «Həbs edilmiş şəxs İlhamiz Quliyevə qarşı məhkum və həbs edilmiş şəxslər, eləcə də işçi heyət tərəfindən qanunsuz hərəkətlərə yol verilməyib, hüquqları təmin edilir və qanuni mənafeləri qorunur», - deyə xidmərdən qeyd ediblər.

* Xatırladaq ki, Quliyev 4 dekabr 2023-cü ildə saxlanılıb, 6 dekabrda isə külli miqdarda narkotik maddə alveri ittihamı ilə 4 ay müddətinə həbs edilib.

Bu il dekabrın 13-də məhkəmə Quliyevi 3 il müddətinə azadlıqdan məhrum edib, ittihamı yüngülləşdirib və onu "külli miqdarda narkotik maddə alveri"ndən "satış məqsədi olmadan külli miqdarda narkotik maddənin qanunsuz saxlanması"na tövsif edib.

Hüquq müdafiəçilərinin fikrincə, Quliyevin həbsinin əsl səbəbi onun “Abzas Media” nəşrinə verdiyi müsahibədə polisin qanunsuz hərəkətlərindən və cinayət işlərinin saxtalaşdırılmasından danışmasıdır. Hüquq müdafiəçiləri İlhamiz Quliyevi siyasi məhbus kimi tanıyıblar.