İran hakimiyyəti humanitar fəlakətin miqyasını gizlətmək istəyir

İran hakimiyyəti avqustun 11-də Şərqi Azərbaycan əyalətində baş vermiş dağıdıcı zəlzələnin nəticələrinin aradan qaldırılması üçün beynəlxalq yardımdan bilərəkdən imtina edib. Bu, faciənin miqyasını gizlətmək məqsədi daşıyır. Bu barədə bu gün Dünya Azərbaycanlıları Konqresinin (DAK) təşkil etdiyi “dəyirmi masa”da bildirilib. 

DAK-ın Cənubi Azərbaycan bölməsinin rəhbəri Babək Muğanlı deyib ki, əslində zəlzələ qurbanlarının sayı beş min nəfərə yaxındır. Görüş iştirakçıları üç gündən sonra axtarış-xilasetmə işlərinin dayandırılması faktını cinayət adlandırıblar, baxmayaraq ki, uçqun altında qalanların bir çoxunu xilas etmək olardı.

Bundan əlavə, belə fikir söylənilib ki, zəlzələ təbii fəlakət olmayıb, tektonik silahın tətbiqi və ya nüvə silahının sınaqdan keçirilməsi nəticəsində baş verə bilər.

Zəlzələnin nəticələri azərbaycanlıların yaşadığı əyalətdə sosial inkişafın zəif olduğunu göstərdi. Belə ki, evlərin çoxu çiy kərpicdən tikilib və sakinlərin çoxu dağıntıdan sonra qalxan tozdan boğularaq ölüb.

“Dəyirmi masa” iştirakçıları İran hakimiyyətindən zəlzələnin nəticələrinin tezliklə aradan qaldırılmasını, zərərçəkənlərə lazımi yardımın göstərilməsini, kompensasiyaların verilməsini, etnik azərbaycanlıların yaşadığı əyalətin sosial-iqtisadi problemlərinin həllini tələb ediblər.—05S06-