İsa Qəmbər: Bu hakimiyyətin törətdiyi təxribat idi

“Lənkərana gedən nümayəndə heyətinə qarşı baş verənlər iqtidarın törətdiyi təxribat idi”. Müsavat Partiyası başqanı İsa Qəmbər bu mövqeyi özü başda olmaqla yanvarın 13-də Lənkərana gedən nümayəndə heyətinə qarşı törədilmiş zorakılıqlara dair bazar ertəsi keçirdiyi mətbuat konfransında söyləyib.

Daha sonra Müsavat lideri törədilən zorakılığın qısa xülasəsini verib. Müsavat Partiyası başqanı Lənkərana rayon təşkilatının 20 illik yubileyində iştirak etmək üçün getdiklərini söyləyib. Bu haqda sosial şəbəkə və media qurumlarının xəbəri olmayıb. Öncə Lənkəran şəhərinin girəcəyinə 10-15 km qalmış korteji yol polisləri saxlayıb. Yarım saata qədər “yoxlama” aparıldıqdan sonra kortej yola düşüb. Şəhərin girəcəyində kortejin qarşısı “Ceep” və “QAZel” markalı maşınlar vasitəsilə kəsilib. Maşınlardan düşən və yaxınlıqlarında olan 100-ə qədər adam hücuma keçib. Basqınçılar İ.Qəmbərə zərər verə bilməsələr də, nümayəndə heyətinin üzvləri fiziki zorakılığa məruz qalıblar. Qarşıdurmaya yol verməmək üçün geri qayıdan nüamyəndə heyəti Biləsuvara qədər izlənilib, hətta kortejin yol qəzasına uğradılmasına qədər əl atılıb. İ.Qəmbərin maşını üzərinə “KAMaz” maşını sürülüb. Bu haqda hüquq-mühafizə orqanlarına xəbər verilsə də, hər-hansı tədbir görülmədiyi nəzərə çatdırılıb. Lənkəran rayon icra hakimiyyətinin bu hadisəni şəhid ailələrinin, sadə insanların qəzəbinin nümayişi kimi saymasını İsa Qəmbər cəfəngiyyat adlandırıb. Şəhid ailələri, sadə vətəndaşlarla hər-hansı problemi olmadığını deyib. Bu hadisəni “Xəzər-Lənkəran” fanatlarının etməsinə cavab olaraq fanklubun hadisəni pisləyən mövqe ortaya qoyduğunu deyərək, bunu əsassız sayıb. “Bu iqtidarın rəqiblərinə münasibətinin göstəricisidir, sui-qəsd cəhdidir, iqtidarın müxalif qüvvələrə “bölgələrə getməyin” xəbərdalığıdır”, - deyə Müsavat başqanı hadisəyə mövqe ifadə edib. O, buna görə dövlət başçısı İlham Əliyevin və PA-nın rəhbəri Ramiz Mehdiyevin məsuliyyət daşıdığını deyib. “Əgər belə deyilsə, qoy onda hüquqi qaydada bunun əksini sübut etsinlər”, - deyə İ.Qəmbər siyasi hakimiyyətə çağırış edib. 

İ.Qəmbər baş vermiş hadisəyə görə Lənkərandan olan şəxslərin sosial şəbəkələrdə bu hadisəni pisləyən, bunun Lənkəranda baş verməsinə görə xəcalət çəkdiklərini yazan insanlara da səslənib. O, buna görə iqtidarın xəcalət çəkməli olduğunu söyləyib. Lənkəran Ziyalılar Birliyi İ.Qəmbəri Lənkərana dəvət edib. Mətbuat konfransında bu dəvəti qəbul etdiyini deyən İ.Qəmbər gediş vaxtını dəqiqləşdirən kimi bu haqda açıqlama verəcəyini deyib. Amma qarşıdakı səfərdə həm mühafizə barədə düşünəcəyi, həm də media mənsublarını bu səfərə dəvət edəcəyi anonsu verib. 

“Rejimə qarşı mübarizə gedir, iqtidar belə cinayətlərlə bizi yolumuzdan döndərə bilməz və biz qalib gələcəyik”, - deyə İ.Qəmbər son olaraq bildirib. -05C-