İsrail Azərbaycanla strateji münasibətlərin əhəmiyyətini vurğulayır

Bakı/04.10.22/Turan: Müdafiə naziri Beni Qantsın Azərbaycana başa çatan səfərini işıqlandıran İsrail mətbuatı ölkənin Müdafiə Nazirliyinə istinadla bildirir ki, nazir səfər zamanı iki ölkə arasında strateji münasibətlərin əhəmiyyətini, habelə dünyada və regionda sülh və sabitlik üçün işin davam etdirilməsi zərurətini qeyd etmək istəyib.

Səfər siyasət və təhlükəsizlik məsələlərinə, habelə iki ölkə arasında əməkdaşlığın dərinləşdirilməsinə həsr olunub. Səfər çərçivəsində müdafiə naziri Azərbaycan prezidenti İlham Əliyevlə görüşüb, Müdafiə Nazirliyində fəxri qarovul dəstəsi tərəfindən qarşılanıb və müdafiə naziri general Zakir Həsənovla görüşüb, Azərbaycan Dövlət Sərhəd Xidmətinin qərargahına baş çəkib, Sərhəd Xidmətinin rəisi Elçin Quliyevlə söhbət edib.

Müdafiə naziri Avraam sazişlərindən (İsrail Dövləti və Birləşmiş Ərəb Əmirlikləri arasında münasibətlərin normallaşması haqqında müqavilə) sonra Yaxın Şərqdə baş verən dəyiikliklərə baxışını bölüşüb, habelə İsrailin Türkiyə, habelə regionda və bütün dünyada digər tərəfdaşları ilə münasibətlərində irəliləyişi müzakirə edib.

Müdafiə nazirinin nümayəndə heyətinə Müdafiə Nazirliyinin baş direktoru podpolkovnik Amir Eşel, Müdafiə Nazirliyinin təhlükəsizlik və siyasət şöbəsinin rəisi briqada generalı Yaki Dolf daxil olub. 

11 oktyabr 2020-ci il tarixində ermənipərəst qrup tərəfindən İsrailin Ali Məhkəməsinə Beni Qantsın Azərbaycana silah tədarükünə görə məsuliyyətə cəlb edilməsi tələbi ilə müraciət təqdim edilib. İttihamlar qəbul edilməyib.--0 --