İvanişvili Saakaşvilinin dediklərinə görə üzr istəyib

Gürcüstanın baş naziri Bidzina İvanişvili xüsusi bəyanatla çıxış edərək prezident Mixail Saakaşvilinin son bəyanatları ilə bağlı “dost ölkələrə” üzrxahlıq edib. 

“Gürcüstan hökuməti ölkənin Avropa və Avroatlantikaya inteqrasiyasının sürətləndirilməsi, ölkənin bütövlüyünün bərpası və regionda sülhün təminatı üzrə səylərini davam etdirir. Bu məqsədlərə nail olmaq üçün məqsədimiz Aİ və NATO qarşısında götürdüyümüz öhdəlikləri yerinə yetirmək, Azərbaycan, Türkiyə, Ermənistanla dost münasibətləri möhkəmləndirmək  və Rusiya ilə münasibətlərin normallaşması yönündə addımlar atmaqdır.

Gürcüstan prezidentinin son vaxtlar etdiyi məsuliyyətsiz çıxışlar və hərəkətlər hökumətin sözügedən istiqamətdə kursuna ziddir, beynəlxalq nüfuza zərbə vurur və yeni hakimiyyətə əlavə xarici və daxili problemlər yaradır.

Təəssüf edirəm ki, bu səbəbdən dost ölkələrin hökumətlərinin və beynəlxalq təşkilatların nümayəndələri pis vəziyyətə düşüblər ki, bununla bağlı Gürcüstan hökuməti adından üzr istəyirəm. Biz gələcəkdə də bu cür insidentlərdən sığorta olunmadığımız üçün bildirmək istəyirəm ki, Gürcüstan prezidenti 2013-cü ilin oktyabrında prezidentlik müddəti bitənə kimi öz şəxsi məsuliyyətindən çıxış edir, onun səfərləri XİN ilə koordinasiya olunmur, onun bəyanatları ölkənin yeni hakimiyyətinin nümayəndələri tərəfindən təsdiqlənmirsə, Gürcüstan hökumətinin mövqeyini əks etdirmir”, - bəyanatda vurğulanır.  

Baş nazir hansı bəyanatları nəzərdə tutduğunu açıqlamır, lakin məlumdur ki, söhbət Saakaşvilinin Azərbaycandan  qayıtdıqdan sonra  verdiyi  bəyanatdan gedir. Belə ki Gürcüstan başçısı bildirib ki, Rusiya Söyün Sadıqov və Vahid Ələkbərovun (“Lukoyl”un rəhbəri) pulları ilə Gürcüstanla Azərbaycanda sabitliyi pozmaq istəyir.

S.Sadıqov “Rustavi-2” telekanalına müsahibəsində Saakaşvilinin sözlərini təkzib edərək onu “ağılsız” adlandırıb və bu məlumatın Gürcüstan prezidentinə İlham Əliyev tərəfindən sızdırılmasına işarə edib.   

“Bizi ölkəni əlavə muxtariyyətlərə parçalamaqla hədələyirlər, Azərbaycanda isə gürcü ssenarisi üzrə hakimiyyət dəyişikliyi hazırlanır. Rusiyada Gürcüstanın Qardebani rayonundan olan Sadıqov adlı bir nəfər var və o, milyarderdir. O vəd edib ki, Gürcüstan azərbaycanlıları üçün muxtariyyətin əldə olunmasına nail olacaq. Eyni şeyi Gürcüstanın yeni hakimiyyəti tərəfindən əfv edilmiş erməni fəal Vaaqn Çaxalyan da vəd edir. O da Gürcüstan erməniləri üçün muxtariyyət məsələsini qaldırır.  Sadıqov milyarder Vahid Ələkbərov və başqaları ilə birlikdə Azərbaycanda da Gürcüstanda baş verənləri təkrarlamağa, böyük pulların köməyilə hakimiyyət dəyişikliyinə hazırlaşırlar”, - Saakaşvili vurğulayıb. 

*Söyün Sadıqov 1960-cı ildə Gürcüstanda anadan olub. 1978-ci ildən sambo üzrə SSRİ çempionudur. 1980—1981-ci illərdə DTK-da çalışıb. 1981-2000-ci illərdə Moskvada tikinti biznesi ilə məşğul olub və “Mosjilstroybank”ın prezidenti olub. Azərbaycan diasporunun fəal üzvüdür. Son vaxtlara qədər Rusiya Azərbaycanlıları Milli-Mədəni Muxtariyyətinin (RA MMM AZƏRROS) rəhbəri olub. Ötən ilin dekabrından Vladimir Putinin səlahiyyətli nümayəndəsidir. -02D-