QK bazarının peşəkar iştirakçılarına əlavə tələblərin siyahısı genişləndirilib

Nazirlər Kabinetinin 28 fevral 2013-cü il tarixli №34 qərarına əsasən, «lisenziya verilməsi qaydalarının təkmilləşdirilməsi” məqsədi ilə qiymətli kağızlar bazarında peşəkar iştirak etməyə iddiaçıların tələblərin siyahısı genişləndirilib 

Əgər 2002-ci ilinn noyabrından bu tələblər ayrı-ayrı növlər üzrə fərdi idisə və tələb sayı 3-4 şərt idisə, indi siyahıda 15 tələb var.

Əvvəllər olduğu kimi, indi də QK bazarında peşəkar fəaliyyət üçün iddiaçılar sonuncu hesabat tarixi üçün tərtib olunmuş maliyyə hesabatları (yeni yaranmış hüquqi şəxslər istisna olmaqla); ərizəçinin və onun bütün filiallarında müvafiq peşəkar fəaliyyəti həyata keçirmək hüququ olan ən azı üç əməkdaşın ixtisas şəhadətnamələrinin surətləri; istifadə ediləcək ofis sahəsində, müvafiq peşəkar fəaliyyətin həyata keçirilməsinə imkan verən kompyuter və telekommunikasiya sistemləri, elektron mühasibat proqramları haqqında məlumat təqdim etməlidirlər. 

Bununla yanaşı, iddiaçılar hüquqi şəxsin, onun filialının təsis sənədlərinin (nizamnamə və əsasnamə), habelə kommersiya hüquqi şəxslərin Dövlət Reyestrindən çıxarışının notarial qaydada təsdiq edilmiş surətləri; ərizəçinin nizamnamə kapitalının 10 (on) və ya daha çox faizini təşkil edən paya birbaşa və ya dolayı yolla sahib olan şəxslər haqqında məlumat təqdim etməlidirlər. Bundan başqa, ərizəçinin digər hüquqi şəxslərin nizamnamə kapitalında 20 və ya daha çox faizi təşkil edən paya birbaşa və ya dolayı yolla sahibliyi haqqında məlumat, eləcə də ərizəçinin təsisçilərinin digər şəxslərin nizamnamə kapitalında 10  və ya daha çox faizi təşkil edən paya birbaşa və ya dolayı yolla sahibliyi haqqında məlumat verməlidirlər.   

Əcnəbi fiziki şəxslər rezidenti olduğu ölkənin ən azı 2 maliyyə təşkilatının müsbət tövsiyələrini və ya bank hesablarından çıxarışlar təqdim etməlidir. 

Qiymətli kağızlar bazarının peşəkar fəaliyyətlə məşğul olmaq istəyənlər 3  il üçün tərtib edilmiş biznes-plan tərtib etməli, təşkilati struktur, daxili nəzarət sistemi yaratmalı, risklərin idarə edilməsi prosedurlarına, yaxşı reputasiyaya malik olmalıdır. --08D—