İvanişvili və Saakaşvili Gürcüstanı birlikdə NATO-ya aparmağı qərara aldılar

Tbilisidə parlament seçkilərindən sonra Gürcüstan prezidenti Mixail Saakaşvili və “Gürcü arzusu” koalisiyasının lideri Bidzina İvanişvilinin ilk görüşü keçirilib. Görüşün yekunlarına görə hər iki tərəf Gürcüstanın NATO və Aİ ilə yaxınlaşmağa davam edəcəyini təsdiq ediblər.

“Bu mənada fikirlərimiz üst-üstə düşür. Bizim strategiyamız Avropaya və Avroatlantik alyansa inteqrasiyadır”, deyə Gürcüstanın baş naziri vəzifəsini tutacaq İvanişvili bildirib.

Onun sözlərinə görə, “Gürcü arzusu”nun strategiyası keçmiş hökumətin strategiyası ilə üst-üstə düşür və gələcəkdə də davam etdiriləcək.

İvanişvili həmçinin elan edib ki, Gürcüstan NATO-ya daxil olacaq. 

Öz növbəsində, Saakaşvili Gürcüstanda hazırda hakimiyyətin demokratik yolla müxalifətə ötürülməsi kimi “tarixi proses” baş verir.

“Biz sülh yolu ilə funksiyaların əksər hissəsini təhvil veririk, bu da regionda ilk dəfə baş verir. Gürcüstan xalqı öz seçimini edib və biz xalqımızın seçiminə hörmət edirik”, deyə Saakaşvili bildirib. Onun sözlərinə görə, hakim partiyanın “rəqibləri ilə fundamental fikir ayrılıqları” qalmaqdadır, amma “biz demokratiyanı qorumalı və seçkilərin gələcəkdə də demokratik olmasına nail olmalıyıq”.

Xatırladaq ki, 1 oktyabr parlament seçkilərində müxalifət 54%-dən çox səs toplayıb. Saakaşvilinin tərəfdarları 40%-dən çox səs alıb.

İndi parlament əksəriyyəti nazirlər kabinetini formalaşdırmalı və prezident tərəfindən təklif edilmiş baş nazirin namizədliyini təsdiq etməlidir.

Bazar ertəsi Bidzina İvanişvili yeni hökumətin tərkibini elan edib. Eyni zamanda, Mixail Saakaşvili bir müddət əvvəl yeni parlament əksəriyyətinin təklif edəcəyi baş nazir namizədliyini parlamentə irəli sürəcəyini bildirib. -02D-