Keçmiş dustaq Nemət Pənahlıya təhlükə olduğunu bildirir

Həbsdə olan Milli Dövlətçilik Partiyasının sədri Nemət Pənahlının Hüquqlarını Müdafiə komitəsi çərşənbə günü RATİ-də mətbuat konfransı keçirib.

Komitə üzvü Sərdar Əlibəyli Nemət Pənahlının məhbus olduğu 17 saylı həbsxanada təxribatlarla üzləşdiyini bildirib. Həbsdə yatdığı 2 ilə yaxın müddət ərzində 3 dəfə sui-qəsdə məruz qaldığını deyib. 

İki həftə öncə həmin həbsxanadan azadlığa çıxan və mətbuat konfransına qatılan məhbus Nurəddin Xanlarov da həbsxanada N.Pənahlıya qarşı təxribatlar olduğunu təsdiqləyib. Onun sözlərinə görə, həbsxanada N.Pənahlı haqqında xalq düşməni, 1990-cı ilin yanvarında xalqın qırılmasında əsas iştirakı olan şəxs obrazı yaradılır. “Bütün bunlar məhbuslarla Nemət arasında qarşıdurma yaradaraq, onu sıradan çıxarmağa xidmət edir”, - deyə keçmiş məhbus qeyd edib. Onun sözlərinə görə, N.Pənahlı ilə qarşıdurmaya bir neçə dustaq maraqlıdır. Bu haqda Penitensiar Xidmətə məlumat verilib.

Adı çəkilən həbsxanada ərzaq saxlanması üçün şərait olmaması, məhbuslarla ailə üzvlərinin görüş yerinin bərbad olması, məhbuslara baş çəkən yaxınlarının rüşvətə məruz qalması və s. nöqsanlarla bağlı 50 məhbus aidiyatı qurumlara müraciət ünvanlayıb. Buna görə həbsxana rəhbərliyi müraciəti imzalayan məhbuslardan kiminə vəd vermək, kiminə hədə-qorxu gəlmək yolu ilə imzalarından imtina etdirmək istəyib. Nəticədə 50 məhbusdan yalnız 9 nəfəri imzasına sadiq qalıb. Buna cavab olaraq həbsxananın daxili rejim rəhbərliyi N.Pənahlını təhqirə məruz qoyub. Onu haqq-hesab çəkmək üçün inzibati binaya aparmağa cəhd etmək istəsələr də, məhbuslar buna mane olublar. N.Xanlarov bildirib ki, həbsxanada vaxtından əvvəl azad olunmaq istəyən məhbus 2500 manat ödəməlidir.        

“Mən bütün məsuliyyətlə deyirəm ki, N.Pənahlıya qarşı təxribat təhlükəsi qalır və həbsxana rəhbərliyi bu təxribatı aradan qaldırmağa maraq göstərmir”, - deyə N.Xanlarov bir daha bəyan edib. -05C-