Kiyev Bakıdan Mustafa Nayemə hücum etməkdə ittiham olunan şəxsin ekstradisiyasını xahiş edir

Bakı/07.05.18/Turan: Ukraynanın Baş Prokurorluğu Azərbaycan hakimiyyətinə Ali Radanın deputatı, jurnalist Mustafa Nayemə hücum etməkdə ittiham olunan Ukrayna vətəndaşı Maqomed Saitovun təhvil verilməsi məqsədilə Azərbaycan hakimiyyətinə müraciət edib.

Bu barədə bazar ertəsi Azərbaycan Baş Prokurorluğunun mətbuat xidməti məlumat yayıb.

Press-relizdə deyilir ki, mayın 4-də Ukrayna Baş Prokurorluğu barəsində beynəlxalq axtarış elan olunmuş Saitovun Kiyevə ekstradisiyası haqqında müraciət edib.

Müəyyən edilib ki, Saitov 2018-ci il aprelin 30-da Kiyev-Bakı reysi ilə Ukraynanı tərk edib. Mayın 2-də Kiyev şəhəri Şevçenko rayon məhkəməsinin qərarı ilə onun barəsində həbs qətimkan tədbiri seçilib.

Azərbaycan DİN-in əməkdaşları Saitovun Bakıda olduğunu müəyyən edib və o, prokurorluğa təqdim edilib.

Məlumatda daha sonra deyilir ki, Saitovun ekstradisiyası üçün tələb olunan sənədlər daxil olmadığına görə ondan başqa yerə getməmək haqqında iltizam qətimkan tədbiri seçilib.

Qeyd edilən ekstradisiya sənədləri Azərbaycan tərəfə təqdim edildikdən sonra bu şəxsin Ukraynaya verilməsi məsələsinə ölkəmizin tərəfdar çıxdığı beynəlxalq müqavilələrin və milli qanunvericiliyin tələblərinə uyğun olaraq baxılacaq.

Aprelin 30-da Kiyevin mərkəzində Nayemin avtomobili Mercedeslə toqquşub, mübahisə başlayıb. Həmin vaxt onların yanına BMW avtomobili yaxınlaşıb. UNİAN agentliyinin məlumatına görə, münaqişə zamanı kişilərdən biri deputatın üzünə vurub. Bu şəxs hadisə yerindən qaçıb gizlənib. Nayem xəstəxanaya yerləşdirilib və əməliyyat olunub. Hüquq mühafizəçiləri hücumda şübhəli bilinən üç nəfəri - iki RF vətəndaşını və bir Ukrayna vətəndaşını saxlayıb. Onlara qarşı Ukrayna Cinayət Məcəlləsinin 296-cı maddəsinin 2-ci hissəsində nəzərdə tutulmuş cinayəti (xuliqanlıq) törətməkdə şübhəli bilinmə ittihamı irəli sürülüb. Deputat Maqomed-Amin Saitova hücum etməkdə şübhəli bilinən dördüncü şəxs hücumun törədildiyi gün təyyarə ilə Bakıya gedib. Ona qarşı qiyabi olaraq CM-in 296-cı maddəsinin 2-ci hissəsində (xuliqanlıq) və 122-ci maddənin 1-ci hissəsində (qəsdən orta ağır bədən xəsarəti yetirmə) nəzərdə tutulmuş cinayətləri törətməkdə şübhəli bilinmə ittihamı irəli sürülüb, barəsində axtarış elan olunub. "Çeçen xalqının diasporası" Ümumukrayna İctimai Təşkilatının maraqlarını təmsil edən vəkil Oleq İşenko bildirib ki, Maqomed-Amin Saitov Bakıda münaqişədən əvvəl iştirak etmək niyyətində olduğu boks turniri başa çatdıqdan sonra Kiyevə qayıdacaq.

Amma Ukrayna hüquq-mühafizə orqanlarının məlumatına görə, Saitov hadisədən sonra zərərçəkmişin Radanın deputatı olduğunu öyrəndikdən sonra Bakıya aviabilet alıb. -06D-