Koordinasiya Şurası 12 yanvar aksiyasını yüksək dəyərləndirib

İctimai Palatanın Koordinasiya Şurası bugünki növbəti toplantısında ölkədəki ictimai-siyasi durumu ərtraflı müzakirə edib. Bu haqda Turan-a iclasa sədrlik edən Zəfər Quliyev bildirib.

O qeyd edib ki, orduda əsgər ölümlərinə etiraz olaraq gənclərin keçirdiyi 12 yanvar aksiyası və yanvarın 13-də Lənkərana gedən Müsavat partiyası başqanı İsa Qəmbərə sui-qəsd diqqət mərkəzində olub.

Orduda əsgər ölümlərilə bağlı qəbul edilən qərarda artan ölüm hallarından narahatlıq ifadə edilir. Buna görə dövlət başçısı İlham Əliyev başda olmaqla, dövlət rəhbərliyinin məsliyyət daşıdığı vurğulanır. Gənclərin keçirdiyi aksiyanı KŞ yüksək dəyərləndirir. Askiyada iştiraka görə gənclərin saxlanmaları və cərimə olunmaları kəskin pislənilir. Eyni zamanda cərimələrin ödənməsilə bağlı gənclərin başladıqları “5 qəpik” kampaniyası KŞ tərəfindən dəstəklənir, bu kampaniyada iştirakçı olan bir gəncin bu gün saxlanmasına etiraz olunur.

Yanvarın 13-də Lənkərana yubiley tədbirinə gedən Müsavat Partiyası başqanı İsa Qəmbərə və partiya nümayəndə heyətinə qarşı cinayət pislənilib. Bu məsələ ilə bağlı yanvarın 23-də “Seçkiqabağı vəziyyət, radikal və kriminal iqtidar problemi” mövzusunda dinləmələr keçirilməsi qərara alınıb. -05B-