Kristofer Ştrasser Azərbaycan hakimiyyətini onun hesabatının tələblərinə əməl etməyə çağırıb

Azərbaycanda siyasi məhbuslara dair məruzənin  hazırlanması zərurəti ondan irəli gəlib ki, 2005-ci ildən ölkə rəhbərliyi bu sahədə Avropa Şurası ilə əməkdaşlıq etməyib. Turan-ın xüsusi müxbirinin Strasburqdan verdiyi məlumata görə, bu barədə AŞPA-nın Azərbaycanda siyasi məhbuslar üzrə məruzəçisi Kristofer Ştrasser iyunun 26-da Strasburqda AŞPA Hüquq Məsələləri və İnsan Haqları Komitəsinin iclasından sonra keçirilən mətbuat konfrasında bildirib.

Bundan bir neçə saat əvvəl Komitə onun bu məsələyə dair hesabatını qəbul edib.

K.Ştrasser həmkarlarının dəstəyindən və sənədin təqdir olunmasından məmnunluğunu ifadə edib.O, təəssüflə qeyd edib ki, Azərbaycan hakimiyyəti onun gəlişinə və vəziyyətlə yerində tanış olmasına maneçilik törədib.

“Ölkəyə gəlmək barədə müraciətlərimə “bizdə siyasi məhbus yoxdur” cavabını aldlm”, - məruzəçi qeyd edib. O ümidvar olduğunu bildirib ki, Komitə məruzəni qədul etdikdən sonra Azərbaycan hakimiyyəti irəli sürülən tövsiyələri yerinə yetirəcək.

Qəbul olunmuş hesabatın önəmindən danışan Ştrasser bildirib ki, “Avropa Şurasının üzvü olan ölkədə insan hüquqları ilə bağlı məsələ real  problemə çevrilib və Parlament Assambleyasına mesajdır”.

Turan-ın Azərbaycanda siyasi məhbusların sayı barədə sualın cavabında Ştrasser deyib ki, ona 89 nəfərin adı daxil olub və o, bu siyahını hakimiyyətə göndərib.

 “Lakin biz məhkəmə deyilik və konkret qərar qəbul etmirik. Biz Avropa İnsan Haqları Konvensiyası ilə zəmanət verimiş azadlıqlara əməl olunmaqla, manipulyasiyadan imtina etməklə, vəkillərin iştirakı təmin olunmaqla “siyasi məhbus” anlamının təyinatının meyarları əsasında bu işlərə baxılmasını tələb edirik”, - Ştrasser vurğulayıb.

9 vicdan məhbusunun azadlığa buraxılmasını alqışlayan Ştrasser Azərbaycan hakimiyyətini siyasi məhbuslar problemini tamamilə həll etməyə çağırıb və Azərbaycana gəlməyə hazır olduğunu bildirib.

“Mən Azərbaycana gəlməyə hazıram, ancaq Avropa Şurasının qaydalarına uyğun olaraq, turist kimi yox. Əgər Azərbaycan hakimiyyəti siyasi irəliləyişə nail olmaq istəyirsə, əməkdaşlığa hazır olmalıdır”, - Ştrasser qeyd edib.

Məruzəçinin fikrincə, onun siyasi məhbusların siyahısına daxil olan adamlarla görüşmək imkanı olmalıdır.

Hesabata gəlincə, sənəd 17 bənddən ibarətdir. Bura siyasi məhbusların işləri üzrə qanunçuluğa əməl olunmasının yoxlanması, məhkəmə prosedurlarının şəffaflığına əməl olunması daxildir. Ştrasser deyib ki, müzakirələr zamanı hesabatdan 4 bənd çıxarılıb.

  O,təəssüflə qeyd edib ki, hakimiyyətin onun Azərbaycana gəlişini qadağan edən bənd qəbul olunmayıb və bu, AŞPA-nın keçmiş rəhbəri Mövlud Çavuşoğlunun təkidi ilə edilib.

  Ştrasser qeyd edib ki, AŞPA payız sessiyasında Azərbaycanda siyasi məhbuslar məsələsinin müzakirəsinə yenidən qayıdacaq. O, hesabatın hazırlanmasında göstərdikləri yardıma görə azərbaycanlı hüquq müdafiəçilərinə və digər vətəndaş fəallarına öz təşəkkürünü bildirib.

  Ştrasserin araşdırmasında əksini tapan meyarlara əsasən “siyasi məhbus” aşağıdakı halda sayılır: 

1) əgər saxlanma Avropa İnsan Hüquqları Konvensiyasında əksini tapan əsas təminatlardan birinin, əsasən fikir, vicdan və din azadlığı, fikrin ifadə olunması və informasiya azadlığı, toplaşma azadlığının (söhbət bu məsələlərlə bağlı birbaşa ittihamın irəli sürülməsindən gedir) birbaşa pozulması ilə həyata keçirilirsə;

2) əgər həbs haqqında qərar sırf siyasi səbəblərlə istənilən cinayətlə əlaqədar olmadan çıxarılırsa;

3) əgər siyasi motivlərlə həbsdə saxlama müddəti və saxlama şəraiti cinayətə proporsional deyilsə (yəni, vətəndaş həbsdə qanunla nəzərdə tutulduğundan çox saxlanılır);

4) əgər vətəndaş siyasi motivlərlə digər şəxslərlə müqayisədə ayrı-seçkilik əsasında saxlanılırsa;

5) əgər saxlanma ədalətsiz çəkişmələrin nəticəsi sayılırsa və bu hakimiyyəti tərəfindən siyasi motivlərlə əlaqədar təqdim olunursa.

.--06C--