Laçın Vəliyev həbsxanada quru aclığı aksiyanın 9-cu günü dayandırıb

Fəal Laçın Vəliyev 10 saylı cəzacəkmə müəssəsində quru aclığı aksiyanın 9-cu günü dayandırıb. Bu barədə Turan-a onun yaxınları məlumat verib.

O, bu qərarı iyunun 2-də həbsxana  rəhbərliyi ona çərşənbə günü Penitensiar xidmətin tibb müəssisəsinə göndərəcəyi barədə vədd verdikdən  sonra qəbul edib.

Bu, onun böyrək xəstələyindən əziyyət çəkməsdi ilə əlaqədar tələblərindən biri idi.

İkinci tələbə - AİHM-in təyin etdiyi kompensasiyanın alınması üçün həyat yoldaşına etibarnamənin verilməsinə şərait yaradılmasına  gəlincə isə, Vəliyevə d yaxın günlərdə bu məsələnin də  həlli vəd edilib.

Penitensiar Xidmətdən şərh almaq mümkün olmayıb.

* Laçın Vəliyev 2021-ci ilin martında “külli miqdarda narkotik maddənin qanunsuz dövriyyəsi” ittihamı ilə həbs edilib. Sonradan “dələduzluq” ittihamı irəli sürülüb və 7,5 il həbs cəzasına məhkum edilib.

Hüquq müdafiəçilərinin fikrincə, Vəliyevin həbsinin əsl səbəbi müxalifətyönlü fəaliyyətidir. O, əvvəllər Müsavat Partiyasının üzvü, sonra isə Xalq Cəbhəsi Partiyasının tərəfdarı olub.

Vəliyev 15 iyul 2020-ci ildə Bakıda keçirilən küçə mitinqlərindən sonra saxlanılıb. 2023-cü ilin sentyabrında Avropa İnsan Hüquqları Məhkəməsi Vəliyevin məhkəmədən əvvəlki ilkin həbsini qanunsuz sayaraq ona 3500 avro kompensasiya ödənilməsini qərara alıb.

Qeyd edək ki, hökumət Laçın Vəliyevin hüquqlarının pozulmasını birtərəfli qaydada tanıyıb və mənəvi ziyanı ödəməyə hazır olduğunu bildirib.