Lavrov Qarabağda atəşkəs ümidini itirmir

Moskva/19.10.20/Turan: Rusiya, Azərbaycan və Ermənistan ən yaxın vaxtlarda Dağlıq Qarabağda atəşkəsə nəzarət mexanizmini razılaşdıra bilər. Bu barədə RF XİN rəhbəri Sergey Lavrov bazar ertəsi mətbuat konfransında bildirib.

Atəşkəsin olması üçün atəşkəs rejiminə əməl edilməsinə nəzarət mexanizminin yaradılması vacibdir. “Biz bunun üzərində fəal işləyirik, o cümlədən bizim Müdafiə Nazirliyimiz ilk növbədə Azərbaycan və Ermənistandan olan həmkarları ilə fəal iş aparır. Ümid edirəm ki, ən yaxın vaxtlarda belə mexanizm razılaşdırılacaq”, - o deyib.

Hələlik ən başlıcası həm tərəflər arasında, həm də beynəlxalq oyunçular tərəfindən qarşıdurma ritorikasını dərhal dayandırmaqdır, Lavrov Türkiyəni nəzərdə tutaraq qeyd edib.

Bununla yanaşı, hərbi əməliyyatları, mülki obyektlərə zərbələri dayandırmaq lazımdır: “Bu, ATƏT-in Minsk Qrupunun həmsədr ölkələrinin -Rusiya, ABŞ və Fransa prezidentlərinin bəyanatında da əks olunan tələbdir”, - o qeyd edib.

Lavrov münaqişənin siyasi yolla nizamlanması üzrə səylərin əhəmiyyətli dərəcədə sürətləndirilməsinin vacibliyini bildirib:  “Biz tərəfləri regionda vəziyyəti daha uzunmüddətli sabitləşdirməyə imkan verəcək əsas müddəaları razılaşdırmağa sövq etməliyik”.-02D-