Media Hüququ İnstitutu mediaya qarşı məhkəmə cərimələrinin artdığını bildirir

Media Hüququ İnstitutu (MHİ) məhkəmələrin tənqidçi medianı, jurnalistləri diffamasiya iddialarına əsaslanaraq yüksək məbləğdə cərimələməsindən ciddi narahatlığını bildirib. 

MHİ-nin Turan-a daxil olduğu bəyanatda qeyd olunur ki, yerli məhkəmələr son aylarda bir neçə qəzetə qarşı çox sərt qərarlar çıxarıblar.

Bildirilir ki, Nərimanov Rayon Məhkəməsi Xırdalan Pivə Zavodunun rəhbərinin “Xural” qəzetinə, Lənkəran məhkəməsi millət vəkili Novruzəli Aslanovun, Yasamal məhkəməsi Bakı Metropoliteninin rəisinin “Azadlıq” qəzetinə qarşı iddialarını, 2 saylı İnzibati İqtisad Məhkəməsi “Gilan” Holdinqin “Yeni Müsavat” qəzetinə qarşı iddiasını təmin edib. Qəzetlərin iddiaçılara mənəvi zərər əvəzi olaraq ümumilikdə 130 000 manatdan artıq cərimə ödəməsi barədə qərarlar çıxarılıb. 

MHİ hesab edir ki, jurnalistlərin, medianın üzərinə onların ödəyə bilməyəcəyi qeyri-adekvat cərimələrin qoyulması özlüyündə elə senzuradır.

Buna görə  də təşkilat  hökuməti ifadə azadlığı ilə bağlı mülki işlərdə ədalətli qərarlar verməyi təmin edən, demokratik ölkələrin məhkəmə təcrübəsində, xüsusilə Avropa Məhkəməsinin baxdığı işlərdə sınaqdan keçmiş test və meyarları özündə birləşdirən diffamasiya qanununu tezliklə müzakirəyə çıxarmağa və qəbul etməyə çağırır. -16D-