Media mənsubları ifadə azadlığı sahəsində durumun bütün parametrlər üzrə pisləşdiyini bildirirlər

Cümə günü RATİ-də ifadə azadlığının durumuna dair dinləmələr keçirilib.

Öncə martın 2-də qətlinin 8-ci ili tamam olacaq jurnalist Elmar Hüseynovun xatirəsi anılıb. Daha sonra isə 2011-ci il martın 2-dən bu yana ötən dövr ərizndə ifadə azadlığının durumu müzakirə edilib. 

Turan-ın direktoru Mehman Əliyev ötən bir il ərzində ifadə azadlığı sahəsində bütün istiqamətlər üzrə durumun pisləşdiyini xüsusi vurğulayıb. Media qurumlarının itisadi əsaslarının sarsıdılması, yayım sisteminin çökdürülməsi, jurnalistlərə qarşı zorakılıq hallarının artması, məhkəmələr vasitəsilə müstəqil medianın fantastik cərimələrə məruz qalması, internetin nəzarətə götürülməsi cəhdlərinin çoxalması qeyd olunub. Qeyri-leqal maliyyələşdirmənin artdığı xüsusi qeyd edilib. 2011-ci ilin sonlarından müstəqil mediaya və xüsusilə “Azadlıq” qəzetinə basqıların artdığı deyilib. Qəzetə qarşı məhkəmə iddialarının nəticəsi olan yüksək cərimələr iqtidarın qəzeti çökdürmək siyasəti adlandırılıb. Qəzetə qarşı məhkəmə iddiaları ayrı-ayrı məmurların təşəbbüsü yox, iqtidarın yuxarı eşelonunun sifarişi sayılıb. 

“Press-köşk” adı ilə quraşdırılan yeni köşklərin qəzet köşkündən çox “mini-market” olması vurğulanıb. Bu köşklərdə müstəqil qəzetlərin satışının olmadığı nəzərə çatdırılıb. İqtidarın interneti çoxsaylı saytlar yaratmaq yolu ilə nəzarətə götürməsi xəttinin iflasa uğradığı vurğulanıb. Milyonlar xərclənməsinə baxmayaraq, bu internet resurslar diqqət kəsb etməyib. Mətbuat Şurasında (MŞ) internetə nəzarət üzrə məsələyə Mətbuat Şurasının qoşulmasının ifadə azadlığına ciddi təhlükə yaratdığı bildirilib. 

“Azadlıq” qəzetinin redaktor müavini Rahim Hacılı qəzetə basqıları önə çəkib. Ölkədəki problemlərin kökündə mövcud rejimin durması, bu rejim qaldıca problemlərin də qalacağı deyilib. Qəzetin problemlərinin ölkədəki problemlərin tərkib hissəsi olduğu deyilib. Ölkə ictimaiyyətinin həqiqəti yazan 2-3 qəzetə etimad etməsinin iqtidarı ciddi narahat etdiyi və qəzetə basqıların bu narahatlıqdan qaynaqlandığı qeyd olunub. Redaktor seçki ili olan 2013-cü ildə ictimai fəallıq artdıqca qəzetə basqıların, təzyiqlərin artacağı, mübarizənin sərt məcraya yönələcəyi xəbərdarlığı edib və ifadə azadlığını müdafiə qrupu yaradılması təklifi verib. 

Media Hüququ İnstitutunun əməkdaşı Xalid Ağəliyev 2005-ci ildən bu yana jurnalistlərə qarşı 500-dən çox zorakılıq olayı olsa da, cəmi 6-sının araşdırıldığını nəzərə çatdırıb. Bu araşdırmalar iqtidara yaxın jurnalistlərin işilə bağlı olub. 

Ötən 8 il ərzində jurnalistlərə qarşı 160 cinayət cəzası tətbiq edilib, bunların yarısı həbs, yarısı islah işləri olub. 2010-cu ildən etibarən junalistlərin peşə fəaliyyətllərinə görə xulqanlıq, narkotik ittihamları həbs olunması tendensiyası başlandığı deyilib. Bu ittihamla 50 jurnalistin həbsə alındığı qeyd edilib. 

Sonda RATİ rəhbəri Emin Hüseyn martın 2-si saat 12:00-da E.Hüseynovun məzarı başında anım mərasimi keçiriləcəyini, axşam isə yaşadığı evin önündə xatirə şamları yandırılacağını nəzərə çatdırıb. -05C-