Milli Məclisin mətbuat xidməti İTAR-TASS-ın məlumatını təkzib edib

Milli Məclisin mətbuat xidməti Azərbaycan parlamentinin spikeri Oqtay Əsədovun fikirləri ilə bağlı İTAR-TASS agentliyinin məlumatını təkzib edib.

Agentliyin məlumatına görə, guya O.Əsədov iyunun 4-də RF Dövlət Dumasının rəhbərliyi ilə görüşündə bildirib ki, ATƏT-in Parlament Assamblyasının Bakı sessiyasında Azərbaycan Rusiyanın Ukrayna ilə bağlı mövqeyini dəstəkləyəcək.

“Bu məlumat həqiqətəuyğun deyil”, - MM-in məlumatında deyilir.

“Spiker O.Əsədovun rəhbərliyi ilə Azərbaycan parlament nümayəndə heyəti iyunun 4-5-də Rusiyada səfərdə olub, Dövlət Duması və Federasiya Şurası rəhbərlikləri ilə görüşlər keçirib.

Görüşlərdə parlamentlərarası əlaqələrin inkişafı, əməkdaşlığın genişləndirilməsi, həmçinin regional məsələlər müzakirə olunub. Milli Məclisin spikeri sözügedən bəyanatla çıxış etməyb”, - məlumatda vurğulanır.

“Azərbaycan müxtəlif səviyyələrdə açıq şəkildə Ukraynanın və digər dövlətlərin ərazi bütövlüyünü dəstəklədiyini bəyan edib və eyni zamanda bu məsələ ilə bağlı Rusiyaya sanksiyaların tətbiqinin əleyhinə olub. Azərbaycan belə məsələlərin beynəlxalq hüquq çərçivəsində danışıqlar yolu ilə həllinə tərəfdardır.

Müasir Azərbaycan parlament diplomatiyası milli maraqlara, beynəlxalq hüquq norma və prinsiplərinə əsaslanır”, - MM-in məlumatında deyilir.

Qeyd edək ki, söhbətin ciddi qalmaqaldan getdiyini nəzərə alsaq Azərbaycan parlamenti İTAR-TASS-dan təkzib verməsini tələb etmir.—1606D-