Milli Şura demokratik qüvvələri siyasi məhbusların azad edilməsi üçün səyləri fəallaşdırmağa çağırıb

Azərbaycan Demokratik Qüvvələrinin Milli Şurası (DQMŞ) ölkə hakimiyyətindən siyasi məhbusları dərhal azad etməyi və fərqli düşüncəyə görə vətəndaşların təqibinə son qoymağı tələb edib.

Dekabrın 3-də DQMŞ-nin sessiyasında qəbul edilmiş bəyanatda Azərbaycanda siyasi məhbusların sayının durmadan artdığı qeyd edilir.

Qorxulusu odur ki, hakimiyyət siyasi həbsləri əvvəlki dövrlərdən daha rahatlıqla həyata keçirməyə başlayıb. Hazırda təkcə paytaxt Bakıda deyil, ölkənin dörd bir yanında qondarma ittihamlar əsasında siyasi maraqlar güdən məhkəmə proseslərinin getməsi bunun əyani sübutlarından biridir.

Milli Şura şərlənərək həbs edilən ictimai fəalların, siyasilərin və onların yaxınlarının, gənclərin, dindarların, jurnalistlərin və internet istifadəçilərinin  azad edilməsini, həmçinin hakimiyyətin bu sahədə əl-qol açmasını dayandırmağı özünün ən başlıca vəzifələrindən biri elan edib.

DQMŞ hesab edir ki, siyasi məhbus probleminin həlli üçün çalışmalara yenidən baxılmalı, yerli və beynəlxalq səylər gücləndirilməlidir. Son dövrlərdə Avropa Şurasının bu sahədə hakimiyyətin xeyrinə atdığı şübhəli addımlar, “kürü diplomatiyası”nın siyasi məhbus probleminin həllində oynadığı mənfi rol yenidən gündəmə gətirilməlidir. 

DQMŞ bəzi beynəlxalq təşkilatların və demokratik dövlətlərin siyasi məhbusların həbsinə “ədalətli mühakimə gözləyirik” kimi mücərrəd şərhlərini yanlış hesab edir.

Bəyanatda daha sonra qeyd edilir ki, Azərbaycan hakimiyyəti siyasi həbslərdən təkcə ölkədə azadlıq çağırışlarını boğmaq üçün istifadə etmir, həm də bunu beynəlxalq təşkilatlarla siyasi alver predmetinə çevirib. Halbuki bütün dünyada nüfuzlu və mötəbər insan haqları qurumlarının, xüsusən də Beynəlxalq Amnistiya təşkilatının siyasi məhbuslarla bağlı rəyi əsas götürülür və problemlər qeyd-şərtsiz aradan qaldırılır. 

“Biz Azərbaycan hakimiyyətindən özbaşınalıqlara son qoymağı, siyasi mülahizələrlə həbs edilmiş vətəndaşlar haqqında Avropa İnsan Haqları məhkəməsinin çıxardığı məhkəmə qərarlarını icra etməyi və İlqar Məmmədov, Tofiq Yaqublu, Qurban Məmmədov, Yadigar Sadıqlı, Rəşad Həsənov, Rəşadət Axundov, Zaur Qurbanlı, İlkin Rüstəmzadə, Bəxtiyar Quliyev, Məmməd Əzizov, Şahin Novruzlu, Üzeyir Məmmədli, Nicat Əliyev, Tale Bagırzadə, Əvəz zeynallı, Nemət Pənahlı, Hilal Məmmədov, Sərdar Əlibəyli, Pərviz Həşimli, İlham Əmiraslanov, Rahib Hacıyev, Rəsul Mürsəlov və bütün siyasi məhbusları azad etməyi tələb edirik”, deyə DQMŞ-nin bəyanatında qeyd edilir. -06D-