Milli Şura rəsmi Bakını özbaşınalıqda ittiham edir

Milli Şura bəyanat yayaraq, rəsmi Bakını azad medianı, müstəqil vəkillər institutunu sıradan çıxarmaq cəhdlərində ittiham edib.

Sənəddə Vəkillər Kollegiyasının Əlayif Həsənov və Xaləddin Bağırovu məhz siyasi sifariş əsasında kollegiya üzvlüyündən azad etdiyi bildirilir. “Milli Şura hesab edir ki, Ə.Həsənov və X.Bağırovun VK-dan qanunsuz şəkildə çıxarılması müstəqil vəkillik instititunun sıradan çıxarılmasına, insanların müdafiəsiz qoyulmasına hesablanıb”, - deyə sənəddə qeyd edilir. 

Daha sonra sənəddə rəsmi Bakının “Azadlıq radiosu”nun əməkdaşı Yafəz Əkrəmoğlunun Naxçıvanda yaşayan ailə üzvlərinə edilən təzyiqlər pislənilir. Sənəddə bu təzyiqlər rəsmi Bakının fərqli düşünən, onu tənqid edən insanları “zor və şantaj yolu ilə susdurmaq” üsulu kimi dəyərləndirilir. Eyni zamanda sənəddə zor gücünə məqsədə yetmək, hakimiyyəti əldə saxlamaq “dövrü”nün bitdiyi xüsusi vurğulanır.

Müəlliflər Ə.Həsənov və X.Bağırovun VK-dan qanunsuz uzaqlaşdırılmalarını, eləcə də “Azadlıq” radiosunun əməkdaşı Y.Əkrəmoğlunun ailəsinə edilən təzyiqləri pisləyir. Rəsmi Bakını belə qanunsuz addımlara son qoymağa çağırırlar. -05D-