Milli Şura: Yadigar Sadıqlının qanunsuz həbsi fərqli siyasi düşüncəli insanlara qarşı repressiyanın tərkib hissəsidir

Milli Şura Müsavat Partiyası başqanının müşaviri Yadigar Sadıqlının barəsində Lənkəran Rayon Məhkəməsinin hökmünü pisləyən bəyanat  verib. 

Demokratik Qüvvələrin Milli Şurasından Turan-a daxil olan sənəddə deyilir ki,  Milli Şura Yadigar Sadıqlı başda olmaqla qanunsuz həbsdə olan bütün siyasi məhbusların dərhal və qeyd şərtsiz azadlığa buraxılmasını bir daha tələb edir. “Milli Şura olaraq məhkəmənin qərarını  qətiyyətlə pisləyirik. Hesab edirik ki, bu addım hüquqa və məntiqə ziddir. 9 oktyabr seçkilərini saxtalaşdıraraq hakimiyyəti zəbt etmiş mövcud iqtidar öz rəqiblərindən qisas almaq üçün insanları şərləmək və həbsə atmaq siyasətini davam etdirir. Məqsəd insanların gözünü qorxutmaq, onları siyasi fəaliyyətlə məşğul olmaqdan uzaqlaşdırmaqdır. Milli Şura hesab edir ki, Yadigar Sadıqlının qanunsuz həbsi fərqli siyasi düşüncəyə malik insanlara qarşı aparılan  repressiyanın tərkib hissə olmaqla yanaşı onun haqqında çıxarılan bugünkü məhkəmə hökmü də absurd və gülüncdür. Bu qərar Azərbaycan məhkəmələrində hüquq nihilizmin baş alıb getdiyini göstərir”, - bəyanatda qeyd edilir. 

Yanvarın 13-də Lənkəran Rayon Məhkəməsinin qərarı ilə Müsavat Partiyası başqanının müşaviri Yadigar Sadıqlı 6 il müddətinə azadlıqdan məhrum edilib. Yadigar Sadıqlı məhkəmənin qərarını siyasi sifariş hesab edir.-03D-