Misir ordusu prezidenti devirdi

Hakimiyyəti devrilmiş Misir prezidenti Məhəmməd Mursi ev həbsinə alınıb. Bu barədə CNN prezidentin köməkçisi Gehad əl-Həddada  istinadən bildirib.

Köməkçinin sözlərinə görə, Mursi prezidentin mühafizəsi tərəfindən həbs olunub və hazırda onun mənzil-qərargahındadır. Mursi ilə birlikdə Prezident  Administrasiyasının əməkdaşları da həbs olunublar.

Al Jazeera kanalının efirində göstərilən videoyazıda Mursi bildirib ki, əvvəlkitək ölkənin legitim rəhbəri olaraq qalır. O, tərəfdarlarını qanunu müdafiə etməyə çağırıb. Lakin bunu dinc, zorakılığa yol vermədən etməyə çağırıb.

Bundan əvvəl “Müsəlman qardaşlar” rəhbərliyinin həbsi barədə xəbər verilib.  Bunlar təşkilatın ali rəhbəri Rəşad əl-Bayumi və hərəkatın siyasi qanadının, Ədalət və İnkişaf Partiyasının rəhbəri Saad Katanidir. Bu siyasətçilər Misirin devrilmiş prezidentinə yaxın olublar. Bundan əlavə, hakimiyyət daha 300 “müsəlman qardaşı” tutmaq barədə göstəriş verib.

Xəbər verildiyi kimi, ölkədə bir sıra islamyönlü telekanalların yayımı dayandırılıb: “Misir-25”, “Hafez” və “Əl-Has”. “Müsəlman qardaşlar”a məxsus “Misir -25” kanalının rəhbərliyi həbs olunub. 

Ötən gün Misir ordusu konstitusiyanı dayandırıb və Mursinin öz postundan devrildiyini elan edib. Hərbçilərin planına görə, ölkədə müvəqqəti hökumət və vaxtından əvvəl prezident seçkilərinə hazırlıq üzrə komissiya formalaşacaq.

Mursinin tərəfdarları və hüquq-mühafizə qüvvələri arasında toqquşmalar nəticəsində ölənlərin sayı 8 nəfərə çatıb, 390-dan çox adam aralanıb. İğtişaşlar, Qahirə, İsgəndəriyyədə və digər yerlərdə baş qaldırıb. -02D-