Mitinqlər davam etdiriləcək - müxalifət (YENİLƏNİB)

Milli Şuranın lideri Cəmil Həsənli hakimiyyətin antixalq xarakterinin əsas əlaməti kimi korrupsiyanı qeyd edib. "Əraziləri işğal edilmiş ölkədə milyardlar offşor zonalara gedir. Hakimiyyət bununla məşğuldursa, onların işğal edilmiş ərazilərin azad edilməsi haqqında düşünməsini gözləmək olar? Əlbəttə ki, yox", deyə o bildirib.

Daha sonra o qeyd edib ki, bu, müxalifətin hakim rejimin hakimiyyəti qəsb etməsinə qarşı son mitinqi deyil. "Biz azad seçkilər uğrunda mübarizəni davam etdiririk, mitinqlərimiz davam edəcək", deyə o bildirib.

Daha sonra Müsavat Partiyasının başçısı Arif Hacılı öz çıxışında qeyd edib ki, onun partiyası da növbədənkənar seçkilərə qarşıdır, çünki seçkilər xalqın öz iradəsini azad şəkildə ifadə etməsi demək deyil. "Ölkədə ədalətli siyasi rəqabət şəraiti yoxdur, seçki komissiyaları hakimiyyətin nəzarəti altındadır, məhz bu komissiyalar əvvəlki seçkiləri saxtalaşdırıb", deyə o bildirib.

Milli Şura üzvü Gültəkin Hacıbəyli hakimiyyəti pensiyaçıların və aztəminatlı vətəndaşların hüquqlarını pozmaqda ittiham edib. Korrupsiyadan və hakimiyyətin düşüncəsiz iqtisadi siyasətindən ən çox əhalinin bu təbəqələri əziyyət çəkir.

Hakimiyyət bütün narazı olanları ölkənin düşməni elan edir və repressiyaya məruz qoyur. Ölkədə siyasi məhbuslar ordusu məhz belə yaranıb, deyə o qeyd edib.

Digər çıxış edənlər siyasi məhbusları azad etmək, siyasi məhbusların qohumlarının təqibinə don qoymaq və hakimiyyətin satqın, casus və xarici dövlətlərin beşinci kolonu kimi qələmə verdiyi müxalifətə qara yaxmağa son qoymaq tələblərini dilə gətiriblər.

Təşkilatçıların sözlərinə görə, mitinqdə on min nəfər iştirak edib.

Mitinq zamanı və aksiya başa çatarkən polislə ciddi qarşıdurmalar olmayıb. -06B-

* * *

2018 Mart 10 (Şəmbə) 17:15:20

Əli Kərimli: Bu hakimiyyət siyasi səhnədən getməlidir (YENİLƏNİB)

Mitinqdə çıxış edən Xalq Cəbhəsi Partiyasının sədri Əli Kərimli hakimiyyətin aksiyanı istənilən yolla pozmağa cəhd etdiyini bildirib. "Təkcə AXCP üzvlərindən 8 nəfər inzibati qaydada həbs olunub, onların üçü mitinq komitəsinin üzvləridir", deyə o qeyd edib. Bundan başqa, Müsavat Partiyasının üzvləri də təzyiq və həbslərə məruz qalıb, deyə Kərimli əlavə edib.

Aksiya iştirakçıları saxtalaşdırma və qanunları və konstitusiyanı zorlamaq yolu ilə hakimiyyət dövrünü daha 7 il uzatmaq istəyən Əliyevin hakimiyyəti qəsb etməsinə etirazlarını bildirmək üçün toplaşıblar.

"Biz daim sussaq, o, hakimiyyəti ömürlük mənimsəyəcək. Amma bu rejim hakimiyyət müddətini necə uzadacağını deyil, çemodanları yığıb səhnədən necə gedəcəyini düşünməlidir", deyə Kərimli bildirib.

AXCP lideri İlham Əliyev hökumətini 15 illik hakimiyyəti dövründə ölkənin bir problemini belə həll edə bilməməkdə ittiham edib. "Onlar yalnız təbii sərvətlər və insan resursları ilə zəngin ölkədə yoxsulluğun artmasına şərait yaradıblar. Bütün bunlar ölçüsüz korrupsiya və sıravi vətəndaşların hüquqlarının pozulması ilə əlaqədar baş verib, biz də məhz bütün bunlara etiraz edirik", deyə Kərimli qeyd edib.

Çıxışının sonunda o, hakimiyyəti xalqdan talan etdiklərindən istifadə etməyə müvəffəq olmayan digər diktatorların acı təcrübəsini nəzərə almağa çağırıb. "Qərb banklarında yığdığı 16 mlrd. dollar Qəddafinin rifahına və təhlükəsizliyinə zəmanət verə bilmədi. Qoy hakimiyyətimiz tarixin bu dərslərini nəzərə alsın", deyə Kərimli sözünü tamamlayıb. -06D-

* * *

2018 Mart 10 (Şəmbə) 15:59:36

Müxalifətin korrupsiya və hüquqların pozulmasına qarşı mitinqi başlayıb

Bakı/10.03.18/Turan: Saat 15-də paytaxtın Yasamal rayonunda "Məhsul" stadionunda Milli Şura, Xalq Cəbhəsi və Müsavat partiyalarının üzvlərinin iştirakı ilə müxalifətin hakimiyyət tərəfindən icazə verilmiş mitinqi başlayıb.

Aksiyada minlərlə insan iştirak edir. Aksiyanın sosial şəbəkələrdə canlı yayımlanmasına yol verməmək üçün hakimiyyət mitinqin keçirildiyi ərazidə interneti kəsib. -02D-