Mixail Saakaşvili pulsuz İnternet vəd edir

Oktyabrın 1-də Gürcüstanda parlament seçkiləri keçiriləcək. Hakim “Vahid milli hərəkat” partiyasının 70 min tərəfdarı cümə günü axşam Tbilisinin mərkəzində “Dinamo Arena” stadionunda son seçkiqabağı mitinqə toplaşıb.

Bütün Gürcüstanı təmsil edən aksiya iştirakçıları qarşısında partiyanın sədri, Gürcüstan prezidenti Mixail Saakaşvili iştirak edib. O, çıxışına artıq Gürcüstana bilet alan hər kəsə onları geri verməyi məsləhət görməklə başlayıb. Belə ki, seçkilərdə onun partiyası qalib gələcək. Bu barədə Gürcüstanın mərkəzindən Turan-ın xüsusi müxbiri xəbər verib.

Sosial proqramlara toxunan Saakaşvili hər bir ailəyə pulsuz səhiyyə, yeni iş yerləri, sığorta, kənd təsərrüfatının inkişafını, hər bir vətəndaşa 1000 lari (təxminən 600 dollar) və pulsuz internet vəd edib.

“Sizin köməyinizə ehtiyacım var”, deyə prezident seçicilərə müraciət edib.

Həbsxanalarda zorakılıqla bağlı qalmaqala toxunan prezident bildirib ki, bu, “bütün ictimaiyyəti silkələyən dəhşətli kadrlar idi”. “Lakin biz qorxmadıq, biz iki naziri işdən çıxardıq, zorakıları həbs etdik, bütün sistemi dəyişdik, xalq müdafiəçisi həbsxana naziri təyin etdik və yenidən sübut etdik ki, problemlərə qarşı mübarizə aparmağa və səhvlərimizi düzəltməyə hazırıq”, deyə Saakaşvili bildirib.

Gürcüstan prezidenti qeyd edib ki, 1 oktyabr Vahid Milli Hərəkatın qələbəsi günü olacaq və xalq gələcək inkişaf və irəliləyişlərə səs verəcək. “Biz heç vaxt geri qayıtmayacağıq, biz yalnız irəliyə getməliyik və əminəm ki, xalq da bu fikirdədir”, deyə o qeyd edib.

Bu gün Tbilisinin mərkəzində Bidzin İvanişvilinin rəhbərlik etdiyi “Gürcü arzusu” müxalifət partiyasının mitinqi keçiriləcək. -16В-