Miyatoviç noyabrda Azərbaycana gələcək

Tbilisidə ATƏT-in media məsələləri üzrə “Ənənəvi KİV-lərdən on-line media-ya doğru: ən yaxşı təcrübə və perspektivlər” mövzusunda 9-cu ənənəvi Cənubi Qafqaz Konfransı başa çatıb. 

Konfransın yekunlarına görə hökumətlərə söz və mətbuat azadlığına riayət etmək, jurnalistlərə, blogerlərə və on-line mediada tənqidi fikirlərini ifadə edən fəallara qarşı təzyiqlərə son qoymaq çağırışı yer alan 16 maddədən ibarət Bəyannamə qəbul edilib. Bu barədə Turan-ın Tbilisidəki xüsusi müxbiri xəbər verib. 

Müzakirələr zamanı azərbaycanlı jurnalist Xədicə İsmayılova Azərbaycanda bloger Zaur Qurbanlının, hüquq müdafiəçisi Taleh Xasməmmədovun, jurnalist Fərəməz Allahverdiyevin sosial şəbəkələrdə fikirlərini paylaşdıqlarına görə həbsdə olduğunu bildirib.

Bununla əlaqədar olaraq, ATƏT-in KİV azadlığı üzrə xüsusi nümayəndəsi Dunya Miyatoviç bildirib ki, noyabrda Azərbaycana səfəri zamanı bu məsələləri qaldıracaq. Onun sözlərinə görə, mətbuat azadlığı yalnız Cənubi Qafqazda deyil, başqa regionlarda da pozulur.

“Bu məsələləri araşdırmaq üçün bütün imkanlarımdan istifadə edəcəyəm və ümid edirəm ki, qəbul edilmiş bəyannamə mənə köməklik edəcək”, deyə Miyatoviç bildirib. O, Tbilisi konfransının regionda mətbuat azadlığı üçün əhəmiyyətini qeyd edib.

“Biz öz fikirlərini bildirən jurnalistləri müdafiə edirik. Region ölkələrində jurnalistikanın və yeni medianın inkişaf etdirilməsinə çalışacağıq. Hakimiyyət azad sözün yayılmasını təmin etməlidir. ATƏT ölkələri bizim tövsiyələrimizi qəbul etməli və yerinə yetirməlidir”, deyə Miyatoviç bildirib.

Konfransın yekunları ilə bağlı şərh verən İREX hüquqşünası Ələsgər Məmmədli bildirib ki, Azərbaycan nümayəndələri İnternet və ifadə azadlığı problemlərinə diqqət çəkiblər. -16C06-