Mövlud Çavuşoğlu Ermənistana verilən dərs, Monitorinq Mərkəzi v Parisin mənfi rolundan danışıb

Bakı/12.11.20/Turan: Türkiyə Dağlıq Qarabağ məsələsində Azərbaycanın istənilən addımını dəstəkləyib və bundan sonra da dəstəkləyəcək. Bu barədə cümə axşamı Türkiyənin xarici işlər naziri Mövlud Çavuşoğlu Bakıda keçirilən mətbuat konfransında bildirib.

Çavuşoğlunun sözlərinə görə, Ermənistan son hadisələrdən dərs çıxarmalı və artıq başqalarının torpaqlarını işğal etməyə cəhd göstərməməlidir. “Əgər Ermənistan Qarabağla bağlı razılaşmanı yenidən pozmağa çalışsa, növbəti sarsıdıcı zərbə və dərs alacaq.

Ya ermənilər razılaşmaya əsasən işğal edilmiş torpaqlardan könüllü şəkildə çıxacaq, ya da Azərbaycan Ordusunun qətiyyətli mövqeyi ilə üzləşəcəklər. Yerevan razılaşmadan erməni xalqının rifahı naminə istifadə etməlidir. Regionda nəqliyyat dəhlizlərinin açılması Ermənistan sakinlərinin rifah halını yaxşılaşdıracaq. Seçim Yerevanındır”, - türkiyəli nazir bildirib.

Çavuşoğlu Rusiyanın Dağlıq Qarabağla bağlı mövqeyini “əhəmiyyətli” adlandırıb. Türkiyə və Rusiya Qarabağa dair bəyanatın maddələrinə əməl olunması ilə bağlı birgə müşahidə məntəqəsinin yaradılması üzrə razılıq əldə ediblər. O qeyd edib ki, Türkiyə-Rusiya Monitorinq Mərkəzi ilə yanaşı, yerlərdə ayrıca “müşahidə şöbələri” yaradılacaq. Mərkəzin yerləşdiyi yer Azərbaycan tərəfindən müəyyən ediləcək. Türkiyənin monitorinq prosesində rolu Rusiyanın rolu ilə eyni olacaq.

Çavuşoğlu bildirib ki, Qarabağa dair birgə müşahidə Mərkəzinin detallarını müzakirə etmək üçün cümə günü Rusiya nümayəndə heyəti Türkiyəyə gedəcək. Müşahidə həm quruda, həm də havada pilotsuz uçan aparatlar vasitəsilə aparılacaq. Moskva və Ankara ilə razılaşdırıldıqdan sonra məsələ Azərbaycanın təsdiqinə çıxarılacaq, türkiyəli nazir bildirib.

Türkiyə XİN rəhbəri deyib ki, Monitorinq Mərkəzinin detallarının razılaşdırılması nəticəsində hərbçilərin xaricə göndərilməsi məsələsi Türkiyə parlamentinin təsdiqinə çıxarılacaq.

O qeyd edib ki, ATƏT-in Minsk Qrupuna həmsədrlik edən ölkələr də Qarabağ hadisələrindən dərs çıxarmalı və qərəzli yanaşmadan əl çəkməlidirlər.

“Fransanın son bəyanatları bunun bariz nümunəsidir. Paris təvavüzkar ölkə Ermənistanı dəstəkləməkdən və Türkiyənin ünvanına tənqiddən imtina etməlidir. Obyektivlikdən uzaq olan Fransanın mövqeyi sülh prosesinə zərbə vurur və bu ölkənin gələcəkdə sülh prosesində iştirakını sual altına qoyur”, - o bildirib. -02D-