Media-icmal 12.11.20

“Azərbaycan” qəzeti  “Azərbaycan Qarabağda konstitusion hüquqlarını bərpa etdi” sərlövhəli məqalədə bu il noyabrın 10-da qazanılmış hərbi qələbə dəyərləndirilir. 

Müəllif vurğulayır ki, bu müharibə 44 gün (2020-ci il sentyabrın 27-dən noyabrın 10-na kimi) davam etdi və Azirbaycanın qələbəsilə başa çatdı.

Müəllif deyir ki, torpaqların işğalda qalması Azərbaycanın ən ağrılı problemi idi, beynəlxalq hüquq Azərbaycan tərəfdə olsa da Ermənistann işğaldan əl çəkmək istəməməsi problemin həllinə imkan vermirdi.

Amma 30 ilə yaxın müddətdə nə Ermənistan işğal siyasətinə son qoydu, nə də beynəlxalq ictimaiyyət və vasitəçilər ondan Azərbaycan torpaqlarının boşaldılmasını tələb etdilər.

Müəllif vurğulayır ki, ötən 17 ildə Ermənistan status-kvonu saxlayanda Azərbaycan ordusunu gücləndirməyə başladı.

“Sentyabrın 27-dən başlayan ikinci Qarabağ müharibəsi göstərdi ki, ordumuz hərbi əməliyyatları tamamilə müasir döyüş standartları ilə aparır. Azərbaycanın yüksək dəqiqlikli silahları, pilotsuz uçuş aparatları qarşısında düşmən cəmi 44 gün tab gətirə bildi və sonda təslimçi akta imza atdı”, - müəllif bildirir.

Müəllif yada salır ki, əməliyyatların gedişində 5 şəhər, 4 qəsəbə, 286 kənd işğaldan azad olundu, noyabrın 10-da Azərbaycan və Rusiya prezidentlərinin, Ermənistanın baş nazirinin imzaladıqları bəyanat Azərbaycanın Vətən müharibəsindəki qələbəsinin hüquqi təsdiqi oldu, həm də bu bəyanatla işğalçı Ermənistan Ağdam, Kəlbəcər və Laçın rayonlarını da boşaltmaqla bağlı öhdəlik götürüb.

“Yenisabah.az” saytında yer alan “Türklərin planı budur ki.. - Qarabağ ətrafında inqilabi yenilik” sərlövhəli məqalədə sentyabrın 27-dən noyabrın 10-na kimi davam etmiş hərbi əməliyyatardan sonra Cənubi Qafqaz regionundakı mövcud vəziyyət dəyərləndirilir.

Məqalədə deyilir ki, Azərbaycanın müharibəyə qoşulması zərurət idi, belə ki, Ermənistan işğal altında olan Azərbaycan ərazilərini müxtəlif ölkələrdən gətirilən ermənilərlə məskunlaşdırırdı, bunun nəticələri ağır ola bilərdi..           

Bütün bu addımlarla həm də Ermənistan dünyaya Azərbaycanın işğal faktı ilə barışdığı görüntüsü yaratmaq istəyirdi.

Yazıda vurğulanır ki, Co Bayden prezident seçildikdən sonra Nikol Paşinyan komandasına beynəlxalq  dəstək güclənəcəkdi, bunun əksinə Azərbaycanın mövqeyi zəifləyəcəkdi, odur ki, döyüşə başlamaq vaxtını uzatmaq olmazdı.

Məqalədə Rusiya hərbçilərinin sülhmərmalılar missiyası ilə Azərbaycana gəlməsilə bağlı deyilir ki, bunun olmaması  üçün Rusiya bu regiondan birdəfəlik getməlidir, bu isə hələ baş vermir.  

Amma indiki halda Türkiyə regiona gəlir, Qarabağ ərazisində Azərbaycan yurisdiksiyası tanınır, Türkiyə nəzarət mexanizmində iştirak edir və nəzarət mexanizminin rəhbərlərindən biri kimi Azərbaycanın sığortasıdır”.

Dolayısı ilə müəllif bunu da eşitdirir ki, bu qələbənin səbəblərindən biri də Rusiyanın prosesə müdaxilə etməməsi olub və belə acı təcrübə 1992-93-cü illərdə olub.

“Mətbuat.az” saytı “Azərbaycan dövləti inanılmaz olanı reallığa çevirdi- açıqlama” sərlövhəli məqalədə bu il noyabrın 10-da ''Azərbaycan prezidenti, Ermənistan baş naziri və Rusiya prezidentinin noyabrın 10-u Dağlıq Qarabağ münaqişəsinin həllinə dair açıqlanan bəyanatı AMEA Qafqazşünaslıq İnstitutunun Qafqaz siyasəti şöbəsinin müdiri, tarix üzrə fəlsəfə doktoru Elnur Kəlbizadə ilə dəyərləndirir.

Bu döyüş meydanında Ermənistanın darmadağın edilməsi, Azərbaycanın qələbəsi hesab edilə bilər.

Onun fikrincə, Azərbaycan tərəfin yaranmış beynəlxalq və regional siyasi şəraiti düzgün dəyərləndirməsi Dağlıq Qarabağ münaqişəsinin hərbi-siyasi həllini təmin etdi. Şöbə müdiri deyir ki, ordu cəbhədə, diplomatiya isə masada faktiki olaraq bir neçə il öncə heç kimin ağlına gətirmədiyini, inanılmaz olanı reallığa çevirdi.

E.Kəlbizadə deyir ki, Ermənistan rəhbərliyi özü də bu məğlubiyyəti etiraf edir.

O vurğulayır ki, Azərbaycan beynəlxalq hüquqi səviyyədə tanınan ərazi bütövlüyünə nail olmaqla yanaşı, həm də Naxçıvanın ölkənin əsas hissəsi arasında Zəngəzurdan keçməklə keçidin təmin edilməsinə nail oldu.

O hesab edir ki, dekabrın 1-nə qədər strateji əhəmiyyətli üç rayonun (Ağdam, Kəlbəcər, Laçın) Azərbaycana təslim edilməsi, həm Azərbaycanın mülki  vətəndaşlarının, həm hərbçilərimizin, həm də hərbi gücün qorunmasına hesablanıb.

E.Kəlbizadəyə görə, indi əsas məsələ milli birliyin qorunmasıdır.

“Azpolitika.info.az” da isə "44 günlük hərəkatın 44 il danışılacağına əmin olun - Bu əməliyyat bir oyanışdır..." sərlövhəli məqalədə Azərbaycanın qazandığı qələbənin, 44 gün davam edən hərbi əməliyyatların nəticəsindən danışılır.

“Bıçaq sümüyə dirənmişdi. Azərbaycan öz ərazilərini işğaldan azad etmək üçün əks-hərəkata başladı. Bu hərəkat bəlli bir nöqtəyədək gəldi və nəticə əldə edildi. Gerçəkdən də tarixi dəyəri olan, Azərbaycan və türk tarixinə qızıl hərflərlə yazılacaq uğur əldə edibsiniz. Bu 44 günlük hərəkat bitdi, amma bunun 44 il danışılacağına əmin olun”.

44 gün davam etmiş hərbi əməliyyatlara bu dəyəri isə Türkiyə milli müdafiə naziri Hülusi Akar Bakıdakı çıxışında verib. 

Onun fikrincə, bu əməliyyat həm də bir oyanışdır, Azərbaycan ordusunun gücü, xalqın qələbə sevinci göründü, bu sevinci eynilə Türkiyə də yaşadı. 

Nazir deyir ki, belə hərəkatlar, belə nailiyyətlərdə ən böyük uğurlar şəhidlər və qazilərə aid olur. 

H.Akar bildirib ki, Azərbaycan ordusunun bu qələbəsi böyük hörmətlə qarşılanıb, əldə edilən qələbə bu ordunun bütün dünyaya gücünün göstəricisidir.