Müdafiə Nazirliyi: Ermənistana məxsus helikopter Azərbaycan mövqelərinə hücum edib

Azərbaycan Müdafiə Nazirliyi noyabrın 18-də noyabrın 12-də Ağdam rayonunda Ermənistana məxsus döyüş helikopterinin məhv edilməsinin qrafik təhlilini təqdim edib.

Bu hadisənin qrafiki Müdafiə Nazirliyinin saytında yerləşdirilib. Məlumatda deyilir ki, ərazidə aparılan son müşahidələrə əsasən əməliyyat-kəşfiyyat məlumatları və hərbi aviasiya mütəxəssislərinin rəylərinə istinadən hadisələrin hazırlanmış animasiya modelindən aydın görünür ki, uçuş heyəti helikopterin döyüş təyinatına uyğun olaraq cəbhənin ön xəttində yerləşən mövqelərimizə atəş zərbələri endirmək tapşırığını icra edib.

“Qarşıya qoyulan döyüş tapşırığını yerinə yetirdikdən, yəni mövqelərimizə atəş açdıqdan sonra, düşmən helikopterləri döyüş təlimatlarının tələblərinə tam əməl etməklə bir-birini manevrlərlə qoruyaraq atəş zonasını tərk edirdilər”, deyə məlumatda bildirilir.

Məlumatın sonunda deyilir ki, Azərbaycanın işğal edilmiş əraziləri üzərində uçuşlar ölkənin hava məkanının pozulması kimi qiymətləndirilir və məhz buna görə “movqelərimizə atəş açan düşmən hərbi helikopteri cavab atəşilə məhv edilib”.

Saytda yerləşdirilmiş qrafikə əsasən, helikopterə birbaşa Azərbaycan ordusunun mövqeləri üzərində atəş açılıb. O, Azərbaycan mövqelərindən 100 metr, Ermənistan mövqelərindən 300 metr məsafəyə düşüb.

“İqla-S” daşınan raket zenit kompleksindən atəş 2140 metr məsafədə ikinci müdafiə xəttindən açılıb. -0-