Müdafiə Nazirliyi: MiQ-29-un qəzaya uğramasının səbəbi quşla toqquşmadır

Bakı/22.08.19/Turan: İyulun 24-də Xəzərə düşən MiQ-29 təyyarəsinin "qara qutusundakı" məlumatları tədqiq edən ekspertlər qəzanın səbəbini müəyyən ediblər, bu barədə Azərbaycan Müdafiə Nazirliyinin mətbuat xidmətinin məlumatında deyilir.

Komissiyanın araşdırmadan sonra gəldiyi nəticəyə görə, təyyarə qəza anına qədər tamamilə saz vəziyyətdə olub. Araşdırma göstərib ki, təyyarə dənizə düşməzdən əvvəl yad cisimlə (quş və ya quş dəstəsi) toqquşub və pilot xəsarət alıb, deyə məlumatda bildirilir.

""Qara qutu"dan əldə edilən məlumatlara əsasən, pilot qəzanın qarşısını almaq məqsədilə təyyarənin idarəolunmasını bərpa etməyə cəhd göstərib. Lakin pilotun aldığı ağır bədən xəsarəti bunu mümkünsüz edib və nəticədə aviasiya vasitəsinin qəzaya uğramasına gətirib çıxarıb".

Müdafiə Nazirliyi həmçinin Azərbaycanda aviasiya vasitələrinin gövdəsində yerləşən bort qeydiyyatçısında - "qara qutu"da olan məlumatların oxunması üzrə mütəxəssislərin və xüsusi avadanlığın olmaması barədə iddiaları əsassız adlandırıb. hər uçuşdan sonra "qara qutu"dakı məlumatlar peşəkar aviasiya mütəxəssislərimiz tərəfindən xüsusi laboratoriyada öyrənilir, təhlil edilir, uçuş barədə informasiya müəyyənləşdirilir və bunun nəticəsində hərbi pilotun qarşıya qoyulan tapşırıqları necə icra etməsi və aviasiya vasitəsinin texniki vəziyyəti barədə tam təsəvvür yaranır, deyə məlumatda bildirilir.

Amma bu məlumatdan pilotun katapultasiya etməməsinin səbəbi aydın olmur. Həmçinin, quşlarla toqquşmanın necə kabin şüşəsini qırıb pilota xəsarət yetirə biləcəyi də aydın deyil. -02D-