Müdafiə Nazirliyinin digər keçmiş yüksək vəzifəli nümayəndəsi həbs olunub

     Azərbaycan Müdafiə Nazirliyinin Elmi-Tədqiqat Mərkəzinin keçmiş  rəhbəri Elçin Xəlilov həbs edilib.  O,  vəzifə səlahiyyətlərini aşmaqla,   külli miqdarda dövlət əmlakını talamaqda ittiham olunur. Onun barəsində 3 ay müddətinə həbs qətimkan tədbiri seçilib.

  Müdafiə Nazirliyinin Elmi-Tədqiqat Mərkəzinin fəaliyyətindəki qanun  pozuntusu Hərbi Prokurorluq tərəfindən aparılan araşdırma zamanı məlum olub. İstintaq E.Xəlilovun cinayət məsuliyyətinə cəlb olunması üçün aşkar edilən faktları əsas kimi sayıb. Bu barədə Turan-a Hərbi Prokurorluqdakı mənbə bildirib.

  E. Xəlilova qarşı CM-in 308.2 (vəzifə səlahiyyətindən sui-istifadə) və  179.3.2  (külli miqdarda mənimsəmə və talama) maddələri ilə ittiham irəli sürülüb.  Onu 12 ilədək azadlıqdan məhrumolunma cəzası gözləyə bilər.

  Qeyd edək ki, E.Xəlilov həm də zəlzələnin proqnozlaşdırılması üzrə mütəxəssis kimi tanınır.  Hələ 1989-cu ildən “İNTERGEO-TETİS” Beynəlxalq Elmi-Tədqiqat Kompleksinə rəhbərlik edir.

  Lakin onun Müdafiə Nazirliyindəki fəaliyyəti indiyədək geniş ictimaiyyətə məlum deyildi. O 2013-cü ilin oktyabrında Müdafiə Nazirliyinin rəhbərliyi dəyişdikdən sonra nazirliyin Elmi-Tədqiqat Mərkəzinin rəhbəri vəzifəsindən çıxarılıb.

  E.Xəlilov Müdafiə Nazirliyinin son ay ərzində həbs olunan üçüncü yüksək vəzifəli şəxsidir.

  İstintaqın versiyasına görə, E.Xəlilov Elmi-Tədqiqat Mərkəzinə rəhbərlik etdiyi müddətdə vəzifə səlahiyyətlərini aşmaqla külli miqdarda dövlət əmlakını talayıb.

  Aprelin 3-də Azərbaycan HDQ keçmiş qərargah rəisi, HDQ komandanının vəzifəsini icra edən, birinci dərəcəli kapitan Yunus Məmmədov həbs olunub. O, dələduzluqda və rəsmi sənədlərin saxtalaşdırılmasında ittiham olunub.

  Aprelin 24-də Azərbaycan HDQ keçmiş komandanı, vitse-admiral Sahin Sultanov vəzifə saxtakarlığı və iri məbləğdə dövlət əmlakını mənimsəmək ittihamı ilə həbs olunub.

  Xatırladaq ki, müdafiə naziri dəyişdikdən sonra iyirmiyə yaxın yüksək vəzifəli hərbçi öz postundan kənarlaşdırılıb. Müşahidəçilər güman edirlər ki,  orduda korrupsiya cinayətləri ittihamı ilə daha bir neçə nəfər məsuliyyətə cəlb oluna bilər.  –06D--