Müsavat Partiyası beynəlxalq birliyi Rusiyaya təzyiqləri artırmağa çağırır

Cümə günü Müsavat partiyası Ukrayna və Krımda baş verən hadisələrlə bağlı növbəti bəyanat yayıb.

Martın 6-da verilmiş ilk bəyanatda Ukrayna xalqının avrointeqrasiyadan imtinaya görə Yanukoviç hökumətinə kütləvi etiraza qalxdığı və istefa verməyə məcbur etdiyi əksini tapırdı. Rəsmi Kremlin bununla barışmaması, Ukraynanı cəzalandırmaq üçün Krımın Rusiyaya birləşdirilməsi məqsədilə Krım Muxtar Respublikasında referendum keçirilməsi söhbətini ortaya atdığı nəzərə çatdırılıb.

Eyni zamanda, belə bir məqamda rəsmi Bakıdan Krım tatarlarına dəstək verilməsi tələbi irəli sürülürdü.  İndiki bəyanatda beyənlxalq birliyin tələblərinə baxmayaraq, Rusiyanın Krımda qanunsuz referendum hazırlığını davam etdirməsi önə çəkilir.

Daha sonra sənəddə hadisələrlə yerində tanış olmaq üçün Ukraynaya səfərə gedən Müsavat Partiyası funksionerlərinin Rusiya xüsusi xidmət əməkdaşları tərəfindən saxlanılması və geri qaytarılması xatırladılır. Müəlliflər Kremlin bu davranışını müdaxiləni gerçəkləşdirmək üçün istənilən qanunsuz addımı atmağa hazır olmasının təsdiqi sayırlar.    

Müəlliflər Rusiyanın Ukraynaya hərbi müdaxilə və təxribat cəhdlərini qəti şəkildə pisləyərək Ukraynanın ərazi bütövlüyünü və xalqın haqlı tələblərini dəstəklədiklərini bəyan edirlər. Adı çəkilən qanunsuz referendum qərarının Rusiyanın hərbi təzyiqi altında verildiyinə, Ukrayna və beynəlxalq qanunlara zidd olduğuna görə hüquqi nəticə yaratmayacağını bəyan edirlər.    

Eyni zamanda, Qərb dünyasının bu referendumun nəticələrini tanımayacağı barədə bəyanatı Ruisyanın yanlış yol tutmasını təsdəqiləyən fakt olacağını nəzərə çatdırırlar. Müəlliflər problemin dinc vasitələrlə həlli üçün imkanların tükənmədiyini qeyd edir, bunun üçün beynəlxalq birliyin Rusiyaya təpkiləri daha da artırması tələb edilir. -05D-