NİDA üzvlərinin məhkəməsində

Bu gün Bakı Ağır Cinayətlər Məhkəməsində NİDA hərəkatının 7 fəalının və “Azad Gənclik” təşkilatının üzvü İlkin Rüstəmzadənin işi üzrə növbəti iclas keçirilib.

Bugünki prosesdə təqsirləndirilən Bəxtiyar Quliyevin atası Səməndər Quliyev və təqsirləndirilən Rəşadət Axundov ifadə verib.

S.Quliyev bildirib ki, MTN əməkdaşları onun evində axtarış apararkən məhkəmə qərarı təqdim etməyiblər.

Rəşadət Axundov ittiham aktının saxta olduğunu bildirib. “Bütün ittihamlar absurddur, bunların hamısı əvvəlcədən qurulmuş ssenaridir. Məmməd Əzizov həbs olunduqdan sonra işgəncəyə məruz qaldığı üçün mənə qarşı ifadə verib”, deyə Axundov bildirib.

Növbəti məhkəmə iclası martın 28-nə təyin edilib.

Bütün müttəhimlər Təqsirləndirilən şəxslər 2013-cü ilin mart-aprel aylarında həbs edilib. Onlar Bakıda orduda qeyri-döyüş itkilərinə qarşı 10 mart 2013-cü il etiraz aksiyası zamanı kütləvi iğtişaşlar planlaşdırmaqda ittiham olunurlar. Gənclərə qarşı həmçinin qanunsuz partlayıcı maddə, narkotik saxlamaq və xuliqanlıq ittihamları irəli sürülüb.

Amnesty International bütün həbs edilənləri “vicdan məhbusu” kimi tanıyıb. -16D-