AXCP-nin qərargah-mənzilində partlayışın rəsmi səbəbləri qeyri-ciddidir

AXCP-nin müvəqqəti qərargah-mənzilinin yerləşdiyi binanın söküntüsü qanun pozuntusu ilə həyata keçirilir. Bu barədə martın 3-nə keçən gecə AXCP-nin Bakı şəhəri, Tələt Şıxəliyev küçəsi, 8 ünvanında yerləşən ofisində partlayışı və yanğını araşdıran ictimai “Pventiv reaksiya qrupu”nun (PRQ) hesabatında bildirilir.

Məruzə müəllifləri partlayışa qaz avadanlığının istismar qaydalarının pozulmasının səbəb olmasının şübhə doğurduğunu bildirirlər. Binanın guya qəza vəziyyətində olduğuna görə sökülməsi də şübhə altına alınır.

Çox güman ki, partlayış AXCP-nin ofisinin növbəti dəfə köçürülməsi məqsədilə törədilib, deyə martın 14-də RATİ-nin ofisində təqdim edilmiş hesabatda bildirilir.

PRQ partlayışdan dərhal sonra hadisəyə ictimai marağın yüksək olması ilə əlaqədar jurnalistlərin, ekspertlərin, hüquqşünasların iştirakı ilə yaradılıb.

AXCP öz bəyanatında hadisəni hakimiyyətin təxribatı kimi qiymətləndirib.

Eyni zamanda, Milli Şura və daha bir aparıcı müxalif partiya – Müsavat partlayışı diversiya kimi qiymətləndirib.

Qərargah-mənzilin yerləşdiyi binanın sahibi Azər Əsgərov da zirzəminin hökumət orqanları tərəfindən, daha dəqiq isə fövqəladə hallar naziri Kəmaləddin Heydərovun sifarişi ilə partladıldığını bildirib.

PRQ rəhbəri, jurnalist Əfqan Muxtarlı bildirib ki, 2013-cü ilin oktyabrında sahibkar Əsgərov binasının iki mərtəbəsini AXCP-yə icarə verib, zirzəmidə isə bərbərxana, inşaat materialları anbarı və daşınmaz əmlak satıcılarının ofisi yerləşirdi. Lakin əslində ofisdən makler kontoru kimi istifadə olunmurdu.

Partlayış martın 3-də səhər saat 4:00 radələrində zirzəmidə baş verib. Həmin gün AXCP-nin qərargah-mənzilində AXCP Gənclər Komitəsinin üzvləri – Nuru Nuruzadə və Ruslan Nəsirli növbə çəkirdi.

Onların sözlərinə görə, bir neçə saniyə ara ilə üç partlayış səsi eşidiblər. Onlar “102” xidmətinə zəng ediblər və yalnız 20 dəqiqə sonra əraziyə yanğınsöndürənlər gəlib, yanğının yayılmasının qarşısı alınıb. Yanğınsöndürənlər bildiriblər ki, partlayışa qaz balonundan yanlış istifadə səbəb olub. Daha sonra hadisə yerinə polis əməkdaşları gəlib. Yanğın söndürüldükdən sonra yanğınsöndürənlər və polis ərazini tərk edib.

PRQ üzvləri 3 mart 2014-cü ildə zirzəmiyə baxış keçiriblər, video və fotoçəkiliş həyata keçiriblər, şahidlərin, bina icarəçilərinin ifadələrini yazıblar.

Partlayış nəticəsində kərpic hörgünün 3 15 santimetrlik çəpəri dağılıb. Binanın daşıyıcı sütunlarına və əsas divarlarına ziyan dəyməyib.

Binanın qarşısında 2 propan balonu tapılıb. Onlardan biri bütöv, digəri partlamış idi. Həm də partlayan balon paslı idi və içərisi qum və başqa zir-zibillə dolu idi. Partlamış balonun hissələrinin paslı olduğunu nəzərə alaraq, onun kifayət qədər çoxdan partladığını ehtimal etmək olar.

Bu zaman məlum olub ki, nə bərbərxanada, nə anbarda qaz bolununda istifadə olunmurdu.

Bu ərazidə olan polis zabiti də deyib ki, balonlar sonradan binanın yaxınlığına atılıb (polis zabitinin bəyanatının videoyazısı Məruzəyə əlavə edilir).

Bərbərxananın icarəçisi Muradovun bildirdiyinə görə, qonşu ofisdəki maklerlər də qazdan istifadə etmirdilər. Lakin PRQ üzvləri onları tapa bilməyib, çünki partlayışdan sonra onlar görünməyiblər.

Hüquq-mühafizə orqanları və FHN hadisə yerində araşdırmaya yalnız martın 3-də saat 12:30-da başlayıblar. Onlar icarəçilərdən ifadə almayıblar, maklerləri axtarmayıblar.

Polis əməkdaşlarından biri bildirib ki, hadisə günü videomüşahidə kameraları işləməyib.

Hüquq-mühafizə orqanları isti-isti hadisənin səbəblərinin müəyyən edilməsi üçün heç nə etməyiblər.

Maraqlıdır ki, ofisin komendantı Təzəxan Mirələmli hadisədən iki gün əvvəl uydurma ittihamla həbs edilib.

Bina sahibi Azər Əsgərov bildirib ki, bir müddət əvvəl FHN nümayəndəsi ona ofisi AXCP-yə icarə verməsinin nəticələri barədə xəbərdarlıq ediblər.

Martın 4-də Nərimanov rayon icra hakimiyyəti FHN-nin telefonoqramı əsasında binanın sökülməsi haqqında qərar qəbul edib. Saat 16.00-da artıq söküntü başlayıb.

Hüquqşünas Fuad Ağayevin sözlərinə görə, söküntü Konstitusiyanın, Mülki Məcəllənin və Mənzil Məcəlləsinin pozulması ilə həyata keçirilir.

Qanunvericiliyə əsasən, mülkiyyətçiyə binanın qəza vəziyyətində olması haqqında məlumat verilməli idi, o, bu vəziyyətin aradan qaldırılması üçün tədbirlər görməli idi. Təmir mümkün deyilsə, təhlükəsizlik məqsədi ilə insanlar binadan köçürülə bilər, amma söküntü haqqında qərar məhkəmə tərəfindən qəbul edilməlidir.

Daha sonra hesabatda bildirilir ki, Azərbaycanda əvvəllər də hakimiyyətin siyasi rəqiblərinin yaşadığı və ya ofislərinin yerləşdiyi obyektlər sökülüb.

Belə ki, 11 avqust 2011-ci ildə məhkəmə qərarına baxmayaraq, Sülh və Demokratiya İnstitutunun SDİ direktoru Leyla Yunusun şəxsi mülkiyyəti olan ofisi sökülüb.

Həmçinin Açıq Cəmiyyət Partiyasının fəalı Əli Rza Muxtar və Müsavat Partiyası Gənclər Komitəsinin o vaxtki rəhbəri Tural Abbaslının evləri sökülüb.

Öz növbəsində, SDİ direktoru Yunus mülkiyyətin dağıdılmasına görə kompensasiya ödənilməsi haqqında məhkəmə qərarlarının həyata keçirilməməsi probleminə diqqət çəkib.

Belə ki, Bakı icra başçısı Hacıbala Abutalıbov məhkəmələrin Yunusun özünə kompensasiya ödənilməsi haqqında qərarını yerinə yetirmir.

Daha 6 vətəndaşa məhkəmə qərarının yerinə yetirilməsi yerinə, hələ 2011-ci ildə sökülmüş mənzillərin alış-satışını sənədləşdiriblər.

AXCP lideri Əli Kərimli qeyd edib ki, PRQ-nin hesabatı təsdiq edir ki, partlayış təsadüf deyil, AXCP-yə qarşı məqsədyönlü təxribat idi. Əliyev rejiminin hakimiyyəti ərzində AXCP 5 ofisdən köçürülüb. O, hakimiyyətin hərəkətlərinin hakim rejimin rəqabətdən qorxması adlandırıb.

Onun sözlərinə görə, hakimiyyət mənzilləri, ticarət obyektlərini güclə alaraq, mülkiyyət hüquqlarını total şəkildə pozur.

AXCP məhkəmə vasitəsilə tapdanmış hüquqlarının bərpasına çalışacaq.

“Azərbaycan hakimiyyəti haqqında kriminal rejim kimi danışırdıqsa, indi məlum olur ki, bu, həm də terrorçu rejimdir, belə ki, öz vətəndaşlarının əmlakını partladır, dağıdır”, deyə öz növbəsində DQMŞ-nin lideri Cəmil Həsənli bildirib.

Qeyd edək ki, PRQ bundan əvvəl publisist Rafiq Tağının qətli, “Xural” qəzetinin baş redaktoru Əvəz Zeynallının cinayət təqibi, jurnalist Xədicə İsmayılovanın şəxsi həyatına müdaxilə ilə bağlı araşdırmalar aparıb. -06D-