Müsavat Partiyası iqtidarı repressiya siyasəti yürütməkdə ittiham edib

Müsavat Partiyası rəsmi Bakının cəmiyyəti xof içində saxlamaq üçün yürütdüyü repressiya siyasətini pisləyən bəyanat yayıb. 

Sənəddə ölkənin həbsxanalarında xeyli siyasi məhbus saxlandığı qeyd olunur. 

Müəlliflər rəsmi Bakının beynəlxalq təzyiq hiss etmədikcə, siyasi məhbusları nəinki azad etmədiyini, əksinə, repressiya siyasətini gücləndirdiyini, bu məsələdə dövlətin imici, humanizm məsələlərinin iqtidarı maraqlandırmadığını bildirirlər. Buna nümunə olaraq gənc müsavatçı Nigar Yaqublunun yol-qəza hadisəsinə görə istintaq müddətində həbsə alınması göstərilib.   

Avropa Şurasının siyasi məhbus meyarlarını müəyyən etdikdən sonra belə, rəsmi Bakının siyasi məhbus məsələsini həll etmək istəmədiyi üçün müəlliflər təzyiqləri davam etdirməyi münasib bilirlər.  

Hazırda İctimai Palatanın 2011-ci ildə keçirdiyi aksiyalara görə həbs edilən AXCP Rəyasət Heyətinin üzvü Şahin Həsənli və hüquq müdafiəçisi Vidadi İsgəndərlinin həbsxanada saxlanması ilə yanaşı, jurnalistlər (Əvəz Zeynallı və digərləri), hüquq müdafiəçiləri (Müsavat Partiyasının üzvü Taleh Xasməmmədov və digərləri), söz və fikir azadlığına görə həbs edilən (“Tolışi sədo” qəzetinin baş redaktoru Hilal Məmmədov), hicab probleminə etiraz edən xeyli sayda inanclı vətəndaş (İslam Partiyasının sədri Möhsüm Səmədov və digərləri), ehtiyatsızlıq üzündən qəzada iştirak edən Müsavat Partiyasının Məclis üzvü, Müsavat Gənclər Təşkilatının sədr müavini Nigar Yaqublu, Quba və Sabirabadda siyasi tələblərlə çıxış etdiklərinə görə həbs edilənlər (İlham Əmiraslanov və başqaları) siyasi məhbuslardır. 

Müəlliflər bütövlükdə siyasi baxımdan fəal olan müxtəlif sosial qruplara aid 70-ə qədər vətəndaşın şərlənərək həbsdə saxlandıqlarını yazırlar. 

Müəlliflər iqtidarın qanunsuzluqlarını qətiyyətlə pisləyir, bu özbaşınalığa son qoymasını, siyasi məhbusların dərhal azad olunmasını tələb edirlər. -05D-