Müsavat Partiyası Lənkərandakı təxribatı iqtidarın təşkil etdiyini bildirir

Müsavat Partiyası yanvarın 13-də Lənkəran şəhərində partiya başqanı İsa Qəmbərin kortejinin basqına məruz qalması ilə bağlı bəyanat yayıb. 

Sənəddə bildirilir ki,  Müsavat Partiyasının zona müşavirəsində iştirak etmək üçün Lənkərana  gedən partiya nümayəndə heyətinin qarşısını  

şəhərin girişində 4 ədəd “QazEl” və 5-6 minik avtomobili kəsib. Hücum edən 100-dən artıq şəxs “Xəzər-Lənkəran” futbol klubunun geyimlərində olub. Basqınçılar İ.Qəmbərin maşınını dağıdıb, güzgülərini qırıb, maşının nömrələrini acıblar. “İsa Qəmbər, sizi gördük” və “Sizi istəmirik” qışqıraraq maşının qapılarını dağıdaraq Müsavat başqanına xəsarət yetirməyə çalışıblar. 

Hadisə zamanı Müsavat başqanının müavini Gülağa Aslanlının ayaqları üzərindən maşın sürülüb və partiya funksioneri sağ ayağından xəsarət alıb. Keçmiş vicdan məhbusu Ülvi Quliyev mülki şəxslər tərəfindən qəddarlıqla döyülüb. Jurnalist Mehman Kərimov hadisənin videogörüntüsünü çəkərkən mülki geyimli şəxslər tərəfindən döyülərək maşına mindirilib və ərazidən uzaqlaşdırılıb. M.Kərimovun hara aparıldığı məlum deyil. Müsavatçıların üzərinə yumurta atıblar.   

Lənkəran şəhərinə gedən yol “QazEl” markalı mikroavtobuslar və minik maşınları ilə kəsilib. Nümayəndə heyəti daha böyük qarşıdurmaların və insan ölümlərinin qarşısını almaq məqsədi ilə Lənkərandan geri qayıdıb. İ.Qəmbər  başqa bir maşınla hadisə yerindən uzaqlaşdırılıb. 

Hadisə yerində polis gözə dəyməyib, öyrədilmiş şəxslər arasında qadın və azyaşlı uşaqlar da olub, basqınçılara icra nümayəndələri rəhbərlik edib. 

Müəlliflər baş vermiş hadisənin iqtidarın təşkil etdiyi  təxribat olduğunu bildirir və iqtidara ölkədə başlanan demokratik hərəkatın qarşısının bu üsulla alına bilməyəcəyi barədə xəbərdarlıq edirlər .-05D-