Müsavat Partiyası Mehman Hüseynovun barəsində hökmü pisləyib

Müsavat Partiyası bloger Mehman Hüseynovun həbsinə etiraz bəyanatı yayıb.

Sənəddə deyilir ki, M.Hüseynov Daxili İşlər Nazirliyinin xüsusi ittiham qaydasında şikayətinə əsasən Suraxanı Rayon Məhkəməsinin qərarı ilə iki il azadlıqdan məhrum edilib.

Müəlliflər M.Hüseynovun sosial şəbəkələrdə müəllifi olaraq yaydığı videosüjetlərlə məşhur olduğunu, yüz minlərlə izləyicisinin olduğunu bildirirlər.

“M.Hüseynovun çəkdiyi videosüjetlərdə hakimiyyətin yüksək vəzifəli məmurlarının korrupsiya əməlləri təkzibedilməz şəkildə sübut edilir. Sözsüz ki, onun bu cür fəaliyyəti korrupsiyaçı və mürtəce hakimiyyəti həmişə narahat edib və ona qarşı təzyiqlərə səbəb olub”, -bəyanatda deyilir.

Müəlliflər M.Hüseynov dəfələrlə fiziki təzyiqlərə məruz qaldığını, ona qarşı bir neçə dəfə oğurlanma cəhdinin olduğunu bildirirlər.

Sənəddə deyilir ki, sonuncu dəfə bu il yanvarın 9-da Bakı şəhərində oğurlanaraq polis bölməsinə aparılıb və bir sutka orada saxlanılıb: “Bu müddətdə o, işgəncəyə və insan ləyaqətini alçaldan rəftara məruz qalıb. Azadlığa çıxmış M.Hüseynov polisin bu özbaşınalığı haqqında məlumat yayaraq DİN-in strukturlarını ifşa edib”.

Bəyanatda vurğulanır ki, bu açıqlamadan sonra günahkarlar cəzalanmalı ikən, onun özünü cəzalandırmaq qərarı verilib. 

Bəyanat müəllifləri Suraxanı Rayon Məhkəməsinin qərarını qanunsuz, siyasi sifarişlə çıxarılmış qərar sayaraq M.Hüseynovun dərhal azad olunmasını  tələb edirlər. Bu həbs söz və mətbuat azadlığı haqqında beynəlxalq normalara və milli qanunvericiliyə tamamilə zidd sayılır. -05D-